Tanggungpengawa staf MDSA majak berat lalu begunaka pengeransing sida ngemanahka servis diri sepanjai maya
SRI AMAN: Polisi pemansang ke deka nempa komuniti ke beserakup, lurus penemu, demokratik enggau progresif patut seruran ditusui ngagai rayat ngambika semua pemansang ke dilanggur muntang dikemujur.
Menteri Muda Pemansang Menua Pesisir enggau Pengawa Berumah Datuk Francis Harden Hollis madah, dikena nyapai juluk nya sukung ari rayat empu beguna amat ngambika meri bekau ke manah ngagai pendiau rama.
“Program pemansang komuniti endang beguna amat dikena ngajar mensia mayuh bekerejasama sereta beserakup enggau pangan diri tambah mega sida nyadi pemungkal endur nyapai mayuh bengkah pekara pemansang,” ku iya.
Harden ti mega nyadi Kaban Kunsil Nengeri (ADUN) Simanggang mansutka jaku nya rambau Pengerami Bejadi Logo Program Pemansang Komuniti enggau Pengerami Makai Malam Ninting Taun Opis Kaunsil Pelilih Sri Aman (MDSA) bepalan ba sebengkah hotel tebilang ditu, malam kemari.
Berebak enggau nya, ku iya, pengeransing MDSA dalam ngerembaika Misyen enggau Visyen sida laban ti deka meri servis ke manah ngagai mensia mayuh endang engkeman enggau juluk Menteri Besai ‘Rayat Dikemerat, Penyulut Digiga’.
Taja baka nya, ku iya tanggungpengawa enggau pemar ke majak nyadi maya hari tu nyau betambah berat bepun ari staf mit nyentuk ngagai bala pemesai MDSA.
Nya alai, semua staf MDSA patut ngemaru enggau ngemanahka servis diri sepanjai maya.
Sama bisi datai iya nya Ketuai Kaunsil Opis Pelilih Menua MDSA, Richard Tawan Sedu, Sekretari MDSA, Nelson Mujah Girie, Mandal Sekretari MDSA, Tommy Laman, Temenggung Sii Toh Peng, Kapitan Kuek Aik Seng, Kaunsilor Sia Bie Ju, bala tuai opis perintah, bala tuai raban bansa enggau raban staf MDSA ke bukai.
Ba pengerami nya, Harden bisi nyuaka agih belanja ungkup taun 2015 penyampau RM10,000 ngagai Kelab Sukan dan Rekreasi MDSA dikena sida belajaika program taun dudi.