BERI PUJI: Buda nerima perais pengudah diangkat nyadi champian ba kategori 60.1 ngagai 70kg.
KUCHING: Ngembuan peneleba lebih 20 taun ba pekit mandangka gumpal tubuh udah ngiring Buda Anchah nyapai mayuh gelar champian nyengkaum ba renggat dunya.
Nyapai gelar ‘champion of champion’ ba pekit Mr Borneo di Kota Belud Sabah bedau lama tu tadi, pemujur nya sigi udah disadang.
Tajapia, seiku pemesai ari soldadu langit Malaysia (TUDM) ke beumur 42 taun nya tetap berasai puas ati enggau pemujur ke dijapai.
“Tu meh keterubah iya aku teulihka gelar champian ngarika Sarawak. Ngelamatu aku bepekit ngarika soldadu.
“Aku enda ngelengka ke pemanah TUDM ti udah meri awak ngagai aku ngaul diri ba pengawa mandangka gumpal tubuh,” ku iya.
Peranak Sri Aman nya madah iya deka suah agi bepekit ngarika Sarawak enti udah pinchin ba pengujung taun 2015.
“Udah nya ila, aku deka suah agi bepekit ngarika Sarawak,” ku iya.
Bepekit di Kota Belud, Sabah, Buda menang kategori 60.1 ngagai 70kg ke alai Paijar Upau enggau Augustine Ekin ba penuduk lumur dua enggau tiga.
Ba kategori bukai, Hafez Azwan ari Brunei menang Baruh 60kg, Jauneh Leman ari Sabah menang ba kategori 70.1 ngagai 80kg lalu Remy Rahim Bungkal ke mega ari Sabah menang kategori ngelui 80kg.
Ba pekit nya, Sabah teulihka dua midul emas, tiga perak sereta tiga engkeraju.
Kelimpah Buda, Jeremiah Rukong mujur teulihka midul perak ba kategori ngelui 80kg lalu Suhardi Marzuki ba penuduk lumur empat kategori baruh 60kg.