Dennis ngabas peranak rumah panjai di Marudi

0

MARUDI: Kaban Kunsil Nengeri (ADUN) Telang Usan, Dennis Ngau enggau beberapa iku raban Ketuai Opis Perintah udah mujur bejalai ngabas rayat di kandang menua nya.

Pengawa tu tampak ngayanka pengibuh perintah nengeri ke betuaika Kepala Menteri Datuk Patinggi Tan Sri Adenan Satem ke seruran ngelalau semua Kaban Kunsil Nengeri enggau naka ulih ngemeratka rayat.

Empai lama ke udah, Dennis diuluka Tuai Opis Pemadah Marudi, Joseph James mujur datai ngabas rayat di sekeda rumah panjai raban bansa Iban di Poyut/Lubok Nibong beserimbai enggau program ke diatur Opis Pemadah ‘Program Santai Minda’ begulai enggau raban pemesai ke bukai.

Mua ke pagi, Dennis enggau bala iya bejalai ngagai Rumah Jimbau, Rumah Tanjong di Sg Stapang B, lalu disempulangka ngagai Rumah Tr. Sumbang, Sg Stapang E, Rumah Mapan, Stapang C sereta Rumah Adam di Sg Nawang nyentuk ke lemai.

Pengelelak ke ditapi mimit pan nadai ngerugi raban nembiak Barisan Nasional (BN) ke bejalai nemuai ngagai sekeda kandang alai diau nyengkaum Ulu Haram, Tutoh enggau Apoh.