Harden: Semua raban bansa bela dikemerat

0

Genap bengkah langgur pemansang dulu diperundingka enggau silik ngambika ulih meri penguntung ngagai semua rayat

SRI AMAN: Perintah Barisan Nasional (BN) chukup lurus bejalaika pengawa ungkup rayat pupu bansa di nengeri tu sereta bejalaika polisi enggau langgur pemansang ke meri penguntung ngagai semua piak enda ngira maya.

Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, Projek Koridor Kuasa ke Ulih Dikena Baru Sarawak (SCORE) nya sebengkah chunto projek pemansang ke ulih meri mayuh penguntung ngagai semua rayat pupu bansa ke diau ba puak nengeri tu.

“BN enda kala bejalaika langgur pemansang ke semina nguntungka sesebengkah bansa aja laban di nengeri tu semua rayat enda ngira bansa enggau pengarap bela dikemerat.

“Nya alai, genap bengkah langgur pemansang dulu diperundingka enggau silik ngambika ulih meri penguntung ngagai semua rayat,” ku iya.

Harden ke mega Kaban Kunsil Nengeri Simanggang mansutka jaku nya lebuh bejadi Pengawa Nyuaka Anak Manuk ke diatur Opis Betanam Betupi Sri Aman di Rumah Sap Jumpu, Batu Lintang Undop ditu, kemari.

Kelimpah ari nya, ku iya, semua rayat enda ngira bansa di nengeri tu patut nguna peluang pemansang ke udah disediaka perintah ba endur sida diau enggau manah.

Nya sebengkah jalai ke pemadu manah dikena ngemujurka semua projek pemansang ke bisi diberi perintah ngagai rayat dikena nyungkak pemanah pengidup rayat.

Sama bisi datai ba atur pengawa nya, Pemesai Khas, Kaban Parlimen Sri Aman, Edmund Pirang, Pengulu Micheal John Sanggop, bala ketuai opis perintag enggau Tuai Raban Bansa.

Beserimbai enggau pengerami nya, Harden bisi nyuaka geran bantu ari perintah beungkus RM13,000 ngagai tiga buah Komiti Pemansang enggau Pengelikun Genturung Pendiau (JKKK) di Batu Lintang Undop ditu.