LSS udah berengkah nyaga pengelikun penguna bot nyerumba pengerami Krimas

0

SIBU: Bala raban penerit adat Opis Sungai Sarawak (LSS) udah berengkah bejalaika pengawa di sekeda palan ke udah ditetapka di serata nengeri tu.

Atur tu dipejalaika dikena nyeliahka sebarang pekara ke enda disadang nyadi beserimbai enggau pengerami Hari Krismas enggau Taun Baru taun tu.

Pengemata LSS William Jinep madah, urung 100 iku raban pemesai Opis LSS sereta beberapa buah bot laju udah disediaka di beberapa palan ke engkeman dikena ngemujurka atur nya.

Palan ke pemadu dikemerat iya nya Balleh berindik ari pelilih menua tu ke nadai ngembuan perengka pengangkut bukai ke badas.

“Kitai pechayaka penumpang ke pemadu mayuh iya nya sida ke diau di Balleh-Kapit-Belaga.

“Kena Hari Tiga empai lama ti ke udah, kami mega udah mujur ngatur sebengkah aum begulai enggau semua raban tauke bot ekspress, sida deka meri kerejasama ke chukup badas ngagai piak LSS,” ku iya.

Kelimpah ari nya, William mega madahka LSS deka ngempang sungai ba sekeda palan di beberapa buah palan ke engkeman.

Tu dikena nentuka bot ekspress enggau bot laju nitihka atur pengelikun ke udah ditetapka.

Operasyen pengelikun LSS deka dibantu raban PDRM, Opis Penyaga Orang Periman (JPAM) enggau RELA.

Kelimpah ari nya, iya mega minta mensia mayuh ngambi meri kerejasama ke manah sereta anang berumban lebuh ti nepan enggau nurun ari bot.

Ku iya, LSS deka ngemeratka pengelikun mensia mayuh sereta nagang sekeda ulah ke ngelanggar atur.