MIRI: Kaban Kunsil Nengeri (ADUN) Telang Usan Dennis Ngau Jok ngelalau peranak Telang Usan terus ngenanka penyerakup enggau pangan diri tajapan napi mayuh penanggul.
Iya mansutka jaku nya beserimbai enggau pengerami Pra-Krismas ke diatur Pusat Khidmat Wakil Rakyat Telang Usan enggau Opis Temenggung Raban Bansa Kayan Miri malam Hari Lima empai lama ke udah di Eastwood Valley Golf & Country Club (Eastwood).
“Enda ngira tusah tauka senang, aku ngarapka semua kitai begempung dalam ngereja sebarang pengawa,” ku Dennis.
Ku iya, enti nyema semua piak enda ngira bansa tauka pengarap begempung, tu deka meri kerejasama ke chukup manah.
“Aku enda ngenggaika penemu tu laban sukung ari rayat dipeda chukup tegap kelebih agi rayat di Telang Usan tu ke seruran nyukung aku dalam perintah Barisan Nasional (BN),” ku tandu iya.
Sama bisi ngenataika jaku lalau lebuh pengerami nya, Kaban Komiti Pengatur Pengawa Temenggung Elizabeth Deng.
Kelimpah ari nya, pengerami ke diatur nya mega disempulangka enggau mayuh bengkah aktiviti bukai nyengkaum belagu, kugiran, pengawa nyuaka anugerah khas pemesai raban bansa, enchabut tikit benasit, tanda tradisional raban bansa Orang Ulu sereta nyuaka bantu beserimbai enggau pengerami Hari Krismas ngagai raban nembiak mit ke nyelai pendiau ke dikenataika Pusat Pemulihan Dalam Komuniti (PDK) Eda Beran, Long Laput sereta Eastwood.
Sama bisi datai, Residen Miri Antonio Kahti Galis, Sekretari Politik Kepala Menteri Robert Laing Anyi sereta tuai raban bansa ketua-ketua Telang Usan.