Ulah sekeda anak ke sanggup nganjung apai indai ke Rumah Pangandai Tuai mandangka sida tu enda nemu beterima kasih ke pemanah budi apai indai diri
Ku iya, tu meh maya bala anak malas budi apai indai sida nengah chara nyaga apai indai enggau naka pementas sereta siru.
“Diatu meh peluang kitai malas budi apai indai ke udah ngemesaika kitai ari suba nyentuk ke kitai mujur dalam pengidup baka ke sehari tu,” ku iya.
Harden ke mega Menteri Muda Pemansang Menua Pesisir enggau Pengawa Berumah mansutka jaku nya lebuh nemuai ngabas rumah seiku peranak Kampung Temudok Entulang ke napi penyakit bajung ditu, pagi tadi.
Kenu ku iya, mayuh anak kemaya hari tu bisi dipeda nganjung apai indai sida ngagai Rumah Pengandai Tuai ketegal ti kelalu kiruh bekereja ba opis tauka endur bukai.
Runding ke baka nya kebendar iya enda ulih diterima sereta enda masuk akal laban sebedau tu ku iya, apai indai kitai enda kala ngelengkaka tanggungpengawa sida nyaga kitai ari mit sampai ke besai tajapan kiruh ngereja pengawa.
Nya alai, udah nyadi tanggungpengawa raban anak kemaya hari tu nyaga apai indai sida sereta nyeliahka sebarang runding ti enda manah,” ku iya.
Sama bisi datai rambau penemuai nya, Pengulu Lee Siang Hua, Kapitan Lee Ah Piang, Kapitan Kiew Siew Teck, Kaunsilor Andar Suntai sereta raban parti SUPP Simanggang ke bukai.