Indeks kes jenayah di Kanowit nurun

0

SELAMAT JALAI: Katis (dua kiba) seraya disempulang Mohd Noor benung nyuaka hamper ngagai penguna jalai raya nyerumba Ops Krismas enggau Kimpin Pengelikun Jalai Raya di Kanowit, kemari.

KANOWIT: Pelilih Menua Kanowit ngerikodka indeks jenayah tauka pengawa jai ke nurun urung 27.2 peratus ke semina ngerikodka 16 buah kes naka 22 November taun tu.

Pemangku Ketuai Polis Pelilih Menua Kanowit, Inspektor Mohd Noor Ali madah, taun seiti nyin kemari, pelilih menua tu ngerikodka 22 iti kes jenayah. Tang taun tu penyampau nya mujur nurun ngagai enam iti kes.

“Ari penyampau nya, Kanowit mujur ngerikodka 90 peratus tikas pengelikun pelilih menua tu. Kes jenayah ke bisi nyadi nya semina kes ke lempung sereta nadai kes jenayah berat bisi dirikodka.

“Tu mandangka pelilih menua Kanowit chukup likun, nya alai, kitai patut terus komited sereta chakah nyaga pengelikun di menua tu ngambika endur tu likun dilawa mensia mayuh nyengkaum semua kitai ke nguan menua tu,” ku iya.

Iya mansutka jaku nya ba awak pengarang berita pengudah tembu bejadi program Ops Krismas sereta Kimpin Pengelikun Jalai Alun di pasar Kanowit, kemari.

Pengawa ti ngemunka kimpin nya dipejadi Tuai Kaunsil Pelilih Menua (D.O) Kanowit Katis Noel Nyabong ke diatur Opis Nagang Pengawa Jai enggau Pengelikun Mensia Mayuh (JPJKK) Indu Opis Polis Pelilih (IPD) Kanowit.

Program ke diseretai tiga buah ejensi perintah iya nya Kaunsil Pelilih Menua Kanowit, Opis Pengerara Api enggau Penyah Penusah sereta IPD Kanowit mega bisi ngatur pameran ke alai sida mandangka sekeda perengka ke dikena sida lebuh bejalaika pengawa kelimpah ari meri penerang ngagai mensia mayuh ke bisi ngambi bagi ba kimpin nya.

Kimpin ke diatur sekali tu berambaika leka jaku ‘Rumah Selamat Sampai Ke Destinasi’ ari baruh Langgur Pemujur Besai Menua (NKRA).

Bejaku ngenang sekeda kes bebadi jalai alun ke bisi nyadi, Mohd Noor madahka pelilih menua tu semina ngerikodka dua iti kes bebadi jalai alun naka 22 Disember tu.

“Kelimpah ari jenayah, kes bebadi ba jalai alun mega bisi dirikodka nyadi di pelilih menua tu.

“Tang taja pia, pengibuh enggau pengemerat rayat bekaul enggau pengelikun jalai alun agi tinggi sereta seruran dikemeran,” ku iya.

Nangkanka nya, Katis dalam jaku pengelalu iya ngenataika pengaga ati tanda beterima kasih ngagai IPD Kanowit ke mujur nagang sereta ngurangka pemayuh pengawa jai di pelilih menua nya. Iya ngarapka pelilih menua Kanowit terus likun nyentuk ke belama iya.

Kelimpah ari nya mega, iya nagit pelilih menua Kanowit ulih ngerikodka kusung peratus indeks ba kes bebadi jalai alun.

“Aku minta semua pengereja pengawa perintah di pelilih menua tu meri servis ke pemadu manah ngagai rayat,” ku iya nandu.

Beserimbai enggau program nya, Katis mega bisi nyuaka hamper sereta pemeri khas ngagai sekeda penguna jalai alun ba pasar Kanowit empai la ke udah.