ENGKILILI: Kaban Kunsil Nengeri (ADUN) Engkilili, Dr Johnnical Rayong Ngipa (gambar) madah pemansang deka jampat diasaika rayat pupu bansa di sitak Engkilili nyema penyerakup ke bisi diatu majak ditan sepanjai maya.
Kenu ku iya, sukut penyerakup tu tau mai ulah bebasaka adat enggau bansa bukai di sitak DUN Engkilili.
“Pajak ke meh begulai nitihka aku ngambika perintah ti dipegai Barisan Nasional (BN) ulih ngemujurka mayuh program pemansang ditu,” ku iya.
Iya mansutka jaku nya rambau bejadi Pengerami Tuai Begulai Enggau Rayat di Rumah Adeng Samueh, kemari.
Berebak enggau pengerami nya, Dr Rayong madah deka ngungkupka geran Projek Mit Pemansang Menua Pesisir RM7,000 ngagai Komiti Pemansang enggau Pengelikun Genturung Pendiau Rumah Adeng enggau RM5,000 ungkup Biro Indu sida.
Kelimpah ari nya, ku Rayong semua sukut tu deka nyadi palan alai perintah merambu enggau ngemujurka mayuh bengkah projek pemansang dikena ngubah pengidup rayat sepanjai maya.
Kenu ku iya, entara projek pemansang nya baka nyendiaka perengka infrastruktur nyengkaum kuasa karan, bekal, bantu pelajar enggau jalai.
“Aku minta rayat di DUN Engkilili terus beserakup dibaruh perabung perintah Barisan Nasional (BN) sepanjai maya,” ku iya.
Ba pengerami nya iya ngelalau rayat ba menua pesisir lebih agi di DUN Engkilili anang sesekali melakangka BN laban semina BN aja ke ulih ngubah pengidup rayat.