BERANDAU: Oliver (duduk, tengah) enggau bala komiti ke bukai pengudah tembu aum nya.
Sapit Chairman SRDC Oliver Kuo madah, mensia mayuh ke bisi datai maya nya mega deka diperindang dua iku penanyi tebilang Iban iya nya Ricky EL enggau Shima.
“Kitai deka bebendar gawa ngambika pengerami tu ila ulih diatur enggau mujur.
“Kebuah pia laban pengerami nyambut taun baru tu ukai semina diatur ba Sibu Jaya aja tang mega bela diintu ba serata dunya,” pia ku iya madah ngagai pengarang berita.
Dulu agi ari nya iya udah betuaika aum komiti pengerami ba Wisma Sanyan ditu.
Oliver madah, beberapa bengkah jalai di Sibu Jaya deka ditutup nyengkaum Jalai Boulevard.
Kebuah nutup jalai nya dikena meri alai ngatur pengerami nya.
“Jalai tu deka ditutup berengkah 29 Disember lalu dibuka baru kena 1 Januari 2015.
“Kitai minta ampun ngagai mensia mayuh senentang pekara nya,” ku iya madahka baru.
Maya tu mega iya madahka batang tuju pengerami nya diatur laban deka nyintalka kaul enggau pangan diri.
Nya alai, iya minta mensia mayuh lebih agi sida ke diau ba Sibu Jaya enggau bala ke besemak ulih datai sampal ngulu pengerami nya ila.