AMD 2014: Naroden (empat kiba) enggau Snowdan (empat kanan) begambar nyadika pengingat begulai enggau bala pemenang Anugerah Seumur Idup enggau Anugerah Khas DAMA 2014 sereta bala ke bukai.
KUCHING: Pemanah lagu ‘Nengkadah Langit’, ke disadaka Gabriel Fairuz Louis mai mayuh pemujur ngagai iya empu nyengkaum menang tujuh iti gelar kategori ti bisi dipekitka maya ‘Anugerah Muzik Dayak (AMD) 2014’ kena 20 Disember tu tadi.
Penanyi Iban, ari Sibu nya ukai semina mujur ngetanka penuduk iya nyadi Artis Lelaki Pemadu Manah’ maya AMD 2012 tang mega mujur teulihka kategori Album Pemadu Manah.
Kala nyadi artis Dayak baru ke Pemadu Manah maya AMD 2012, Gabriel mandangka pemendar iya dalam muzik Dayak lebuh iya mega dipadu nyadi artis (ballet) enggau pop ke pengabis manah ba AMD 2014.
Gabriel maya dirandau pengudah abis atur pengawa nya, madahka diri enda nyangka menang tujuh iti gelar ba AMD sekali tu, ke nyadi penyereta kedua kali iya dalam gelar muzik Dayak ke pengabis besai tu.
“Aku enda nyangka ulih menang tujuh kategori nyerumba atur pengawa AMD 2014 sekali tu, laban enti diperatika artis bukai pan manah.
“Aku meri terima kasih ngagai semua sida ke udah mayuh nyukung aku kelebih agi DAMA ba anugerah ke diberi ngagai aku,” ku Gabriel ti bisi mega menang kategori Kulit Album Pemadu Manah, Video Muzik Pemadu Manah sereta Lagu Dayak Pemadu Manah.
Ba atur pengawa ke besai nya mega, DAMA bisi meri tiga iti anugerah, iya nya Anugerah Seumur Idup ke kategori Iban, Bidayuh enggau Orang Ulu sereta seiti Anugerah Khas’.
Gelar ‘Anugerah Seumur Idup Iban’ diberi ngagai Christopher Kelly, lalu ‘Anugerah Seumur Idup Bidayuh’ enggau ‘Orang Ulu’ diberi ngagai Mike Rantai sereta Henry Anyi Ajang.
Gelar ‘Anugerah Khas DAMA’ diberi ngagai pemain sape tebilang, Jerry Kamit kelai basa ngagai iya ke udah mandangka pengeransing enggau pengelandik bemain perengka guna muzik tradisional nya, kelimpah mujur ngangkatka nama muzik etnik Dayak ngagai renggat antarabansa.
Gelar nya disua Menteri Muda ba Opis Kepala Menteri Datuk Naroden Majais, ti sama disempulang ulih Chairman DAMA Snowdan Lawan sereta pemesai bukai.
Ba atur pengawa nya mega, gelar ke ‘Artis Baru Dayak Pemadu Manah’ dimenang The Crew, Single Baru Pemadu Manah (Seventh Tribe GMP), Artis Indu Pemadu Manah (Monica Elen), Artis Beraban @ Duo Pemadu Manah (The Crew), Lirik Pemadu Manah (Janang/Ensiring), Artis Rock Pemadu Manah (Masterpiece), Tusun Muzik Pemadu Manah (Norman Ading) enggau Lagu Dayak Bidayuh Pemadu Manah (Rannee Pat).