MERI BASA: Tun Pehin Sri Taib disempulang Menteri Dagang Temuai Datuk Amar Abang Johari Tun Openg (dua ari kiba) enggau Menteri Muda ba Opis Kepala Menteri (Pekara Islam) Datuk Daud Abdul Rahman (kiba) meri basa kepenudi ngagai Tun Rahman.
SAMPAL DATAI: Tun Salahuddin enggau Toh Puan sama datai meri basa kepenudi ngagai Tun Rahman ba Masjid Jamek, kemari.
BESAMPI: Diri sebilik niang Tun Rahman besampika iya lebuh ba pengawa nguburka niang kemari.
Dikarang Rengenyan Labang //
KUCHING: Penyulai Niang Ex Tuai Pemegai Menua (TYT) enggau Kepala Menteri Ketiga Tun Abdul Rahman Yakub, mujur dikuburka ba Pendam Islam Semariang urung pukul 2 lemai kemari.
Tun Rahman midang lebuh umur iya 87 taun, ba Normah Medical Specialist Centre pukul 9.30 malam Hari Lima tu tadi.
Tun Rahman dibai urung pukul 10 pagi ari rumah iya ngagai Masjid Jamek dikena meri peluang ngagai orang mayuh sereta raban pemesai meri basa kepenudi ngagai niang.
Orang mayuh diungkupka ari pukul 10.30 pagi ngagai 12.00 tengah hari lalu raban pemesai ari pukul 11.30 pagi ngagai 12.30 tengah hari.
Entara pemesai ke bisi datai iya nya Tuai Pemegai Menua (YTY) Tun Pehin Sri Abdul Taib Mahmud enggau bini iya Toh Puan Sri Ragad Kurdi Taib, Kepala Menteri Datuk Patinggi Tan Sri Adenan Satem enggau bini iya Datin Patinggi Datuk Jamilah Anu, Sapit Kepala Menteri Datuk Patinggi Tan Sri Alfred Jabu Numpang enggau bini iya Dato Sri Empiang Jabu enggau kebukai.
Berebak enggau pengawa nguburka Tun Rahman kemari, anak indu iya ti mega Kaban Parlimen Tanjung Manis Datuk Norah Abdul Rahmah ngarika sida sebilik beterima kasih ngagai perintah nengeri enggau semua orang ke gawa ti ngemujurka pengawa nguburka apai iya.
“Aku ngarika kami sebilik beterima kasih ngagai Kepala Menteri, raban pemesai, kaban belayan sereta bala bakih ke bisi datai, kitai udah mujur nguburka apai aku Tun Abdul Rahman Yakub sereta ngarapka Allah meri pengelantang ngagai iya begulai enggau indai kami Hajah Normah,” ku Norah.
Kelimpah ari nya, ti sama ngasaika penyinu ati pemidang Tun Rahman, Anthony Au, 78, ti kaban ari mit lebuh sida diau berimbai di Miri dalam taun 1980-an.
Nitihku Au, kaul rat ukai semina iya engfgau Tun Rahman aja tang mega entara sida sebilik.
“Kami sebilik amat begulai rat enggau sida iya (Tun) sebilik lalu iya (Tun) seiku orang ti amat manah ati sereta ulih bebakih enggau semua orang.
“Ukai semina nya aja, Tun enda kala enda ingatka kami, ambika banding beberapa taun ke udah aku kala betemu enggau iya di Pasar Satok lalu iya ngagau ke aku sereta nanyaka berita kami sebilik,” ku iya seraya madahka, Tun Rahman orang ti ngemaruh diri.
Nambahka Au, seiku agi ti mega kala nyadi setiausaha sulit Tun Rahman, Datu Stephen Jussem, 77, madahka Tun Rahman seiku orang ti panjai runding, ngembuan perambu ti manah sereta manah enggau orang.
“Aku amat gaga ati sepemanjai gawa enggau iya lebih agi maya dua taun nyadi setiausaha sulit.
“Iya madahka Tun Rahman seiku orang ti nadai bechiping sereta panjai runding,” ku iya ti kala nyadi Temenggong Bidayuh bagian Kuching.
Tun Rahman diadaka kena 3 Januari 1928 di Kampung Jepak, Bintulu Sarawak. Tun Rahman teulihka pelajar tumu ba Sekolah Melayu Anchi enggau Sekolah St. Joseph, Miri sebedau nyambung pelajar ngagai Sekolah Menengah di Madrasah Melayu, Kuching ditangkanka ba Sekolah St Joseph Kuching nyentuk Pom Lima.
Ari taun 1951 ngagai 1959, Tun nyambung pelajar tinggi ke Southampton University, England sereta teulihka Ijazah B.A (Law) (Hons).
Tun Rahman berengkah gawa dalam taun 1948 nyadi Pegawai Percubaan (kadet) Bumiputera Sarawak lalu ditikika pangkat nyadi Majistret.
Ari taun 1959 ngagai 1963, Tun Rahman dichirika nyadi Pegawai Perundang Sarawak sebedau ngelengka pengawa sereta masuk dalam dunya politik.
Taun 1963, Tun dichirika nyadi Menteri Muda Pemansang Menua Pesisir lalu udah nya nyadi Menteri Muda Kehakiman ba taun 1964.
Dalam taun 1965, Tun megai portfolio Menteri Penuh Tanah dan Galian nyentuk ngagai taun 1969 enggau udah nya nyadi Menteri Pelajaran Persekutuan ari taun 1969 ngagai 1970.
Taun 1969, keterubah iya Sarawak ngatur pengawa bepilih nengeri sereta enggau pengawa bepilih besai. Ba pengawa bepilih nya Tun dichalonka parti iya, Parti Bumiputera, ti dditumbuhka nengah percantuman Parti Barisan Rakyat Jati Sarawak (BERJASA) enggau Parti Negara Sarawak (PANAS) bediri dalam Majlis Negeri enggau sitak Parlimen. Tun Rahman menang sitak parlimen Payang enggau majlis negeri Kuala Rajang.
Kena 7 Julai 1970, Tun Rahman dichirika nyadi Kepala Menteri Sarawak sereta megai penuduk nya pengelama 11 taun, iya nyentuk ngagai taun 1981.
Tun Rahman udah nya dichirika nyadi Tuai Pemegai Menua (TYT) dalam bulan Ogos 1980.
Tun Rahman iya nya tokoh besai dipilih Tunku Abdul Rahman Putra ba pengawa meri pengarap ngagai rayat Sarawak sereta meri sukung tegap rayat negeri dalam penumbuh Malaysia.
Lalu Tun Rahman entara tokoh politik ti mayuh budi dalam bejalaika pengawa ti pemadu beguna dalam penumbuh Malaysia.