Kelaungka parti ke datai ari Semenanjung laban sida enda ngelala pengidup kitai di Sarawak
KAPIT: Kepala Menteri Datuk Patinggi Tan Sri Adenan Satem ngansak peranak Sarawak ngundi parti asal nengeri tu empu maya pengawa bepilih tu ila.
Ku iya, rayat patut milih Parti Tenaga Rakyat Sarawak (TERAS) enggau Parti Rakyat Bersatu (UPP) kelimpah ari empat parti bukai dalam serakup Barisan Nasional (BN).
“Anang ngundi parti ke datai ari Semenanjung Malaysia baka DAP, PKR tauka PAS ketegal sida enda nemu gaya pengidup kitai di Sarawak ditu.
“PBB, PRS, SPDP, SUPP, UPP enggau TERAS meretika pendiau sereta pengidup peranak nengeri Sarawak ketegal semua parti tu asal ari Sarawak,” ku iya ba pengerami betemu enggau rayat ke diatur di Dewan Suarah Kapit ditu, ensana.
Adenan nambah, kitai di nengeri tu enggai meda parti extrimis ari Semenanjung Malaysia ngatur operasyen di Sarawak ke alai iya enggau nyemetak madah, pintu ditutup rapit ngagai raban extrimis.
“Sapa ngelala Sarawak lebih agi ari peranak asal nengeri tu empu? Ketegal nya anang masuk champur.
“Enda baka di Semenanjung Malaysia, kitai di Sarawak idup enggau likun sereta lantang kelimpah ti bebasaka pangan diri enda ngira bansa tauka jalai pengarap.
“Aku enggai ngajar sida baka ni chara ti patut ngemeranka batang jalai pengarap lalu pia mega sida enda deka ngajar aku baka ni,” ku iya.
Ngenang kaul bukai, Adenan madah, kandang menua pesisir deka dikemansang enggau chakah agi ari ke udah.
Ku iya mengeri besai baka Kuching, Sibu, Bintulu enggau Miri udah disikap enggau perengka guna ke chukup.
“Pengaya dalam kandang mengeri udah chukup. Diatu kitai patut mantu raban ke kurang penatai pemisi di menua pesisir,” tandu iya.