Peranak menua pesisir diperansang bekempit enggau perintah BN

0

MRP: Dr Rayong (tengah) nyuaka MRP ngagai Chaiperson Biro Indu Rh Jubang, Sebangki Panjai, Pn. Anchon Raoh (tiga kiba) seraya dikemata Tr Jubang(tiga kanan) ba pengerami nya.

LUBOK ANTU: Kaban Kunsil Nengeri Engkilili Dr Johnnical Rayong anak Ngipa meransang rayat ke diau di menua pesisir nyukung perintah Barisan Nasional (BN) maya Pengawa Bepilih Kunsil Nengeri (PRN) ke deka diatur dudi tu ila.

Ku iya, sukung penuh ari rayat di menua pesisir beguna amat  sereta ngemudahka perintah BN ngintu sida ari segi pemansang.

“Kita anang sesekali ngenyauhka diri ari perintah BN laban semina BN aja ke ulih ngubah pengidup kita semua,” ku iya.

Iya bejaku munyi tu ba Pengerami Betemu enggau rayat di Rh Jubang anak Bin, Sebangki Panjai ditu, kemari.

Berebak enggau pengerami nya, Rayong lalu nyuaka Projek Mit Pemansang Menua Pesisir (MRP) RM3000 ngagai Biro Indu Rh Jubang, Sebangki Panjai, LubokAntu.

Ku Dr Rayong baru, rayat meri terima kasih ngagai BN laban perintah BN udah chakah meri perengkaguna ngagai menua pesisir.

“Kena meri terima kasih ngagai BN sukung meh perinttah laban ti udah bebendar nyungkak tikas pengidup kita semua,” ku iya.

Kelimpah ari nya, Dr Rayong mega ngelalau apai indai bebendar agi ngemansang pelajar sekula anak sida.

Ku iya, pelajar beguna amat ngagai kita semua laban sida ulih nyaup ngubah tikas ekonomi peranak menua pesisir.

“Enti anak kita nyadi orang ke beguna jemah ila, sida mega ulih ngubah pengidup kita nyadi lantang ,” ku iya.