RTC Mid Layar disadang meri impak ekonomi

0

PENYUNGKAK EKONOMI: Datu Chaiti Bolhassan (tiga kiba) mendingka penerang bekaul enggau palan nya ke deka nyadi palan RTC Betong.

Palan ti beungkus RM8 juta nya dikearap ulih nyaup nyungkak penatai pemisi rayat dia

BETONG: Pengawa numbuhka Palan Transformasyen Menua Pesisir (RTC) di Mid Layar Betong diadang deka meri mayuh penguntung ngagai peranak ke diau besemak enggau pelilih menua nya enti sema palan nya berengkah diguna ila kelebih agi nyungkak pemanah tikas ekonomi rayat dia.

Sapit Residen (Pemansang) Pelilih Betong, Galong Luang madah, perambu ti deka numbuhka RTC Betong nya sebagi ari perambu ke dilanggur perintah dikena nyendiaka servis ke ulih meri pengelantang ngagai rayat.

“Tuju perintah numbuhka RTC tu iya nya dikena nyendiaka mayuh bansa servis ngagai rayat nyengkaum nyendiaka palan perengka logistik ke lebih manah.

“Kelimpah ari nya, nyendiaka palan ngulihka penemu, pengelandik sereta penau kelimpah ari nyendiaka servis bantu belanja,” ku iya.

“Nengah servis ke bisi disediaka ba palan tu, rayat di serata pelilih menua tu ulih nguna semua bansa servis ke bisi.

“Ambi ke chunto, rayat ulih nyual asil utai ditanam sechara terus sereta bekunsi penemu enggau pangan diri,” ku iya.

“Perintah udah besetuju deka nguna begunan Pasar Tamu Betong ke bepalan ba Mid Layar Betong alai ngaga RTC nya.

“Perintah udah ngemendarka atur pemansang nya sereta Opis Menteri Wang Menua Malaysia deka ngungkupka agih belanja urung RM8 juta dikena ngaga palan nya sechara berenggat belabuh ari taun tu,” tandu iya.

Ku Galong, pekara nya udah dikenukuka pengudah aum bekaul enggau perambu deka ngaga palan RTC nya ke diketuai Sapit Kepala Menteri Sarawak, Datuk Patinggi Tan Sri Alfred Jabu Numpang ke diatur di bandaraya Kuching, empai lama ke udah.

Sama bisi gulu aum nya, Sekretari Mendam Opis Menteri Pemansang Menua Pesisir (KPLB), Datu Chaiti Bolhassan, Pemesai ari Opis Menteri Wang Menua Malaysia, Pemesai Opis Menteri Pelajar Menua Malaysia, Pemesai Opis Menteri Pemansang Menua Pesisir enggau Kandang Menua (KKLW), Pemesai Opis Langgur Pemujur Besai Menua (NKRA) sereta Sekretari Politik, Menteri Kebun Dandang Besai enggau Komoditi (MPIC), Dr Richard Rapu.

Berebak enggau nya, sebengkah penemuai dikena ngabas palan nya mega bisi diatur lalu disempulang raban pemesai ke bukai ditu, kemari.