KUCHING: Bisi 555 iku pemesai Opis Pengerara Api (Bomba) enggau Penyah Penusah Sarawak ngaul diri ba operasyen bah di serata nengeri tu, ku Direktor Nor Hisham Mohammad.
Ku iya, dalam dalam timpuh berengkah 17 nyentuk 22 Januari 2015 raban Bomba tu udah bejalaika 200 bengkah pengawa matau palan penusah bah sereta 81 operasyen nyelamat enggau mindah orang ke tasah ketegal ampuh bah.
“Bomba Sarawak udah bejalaika atur itensif ke alai penyampau 555 iku pemesai iya nya setengah ari penyampau tubuh raban Bomba Sarawak ngaul diri ba operasyen bah.
“Tebal agi operasyen diadu di kandang endur Pelilih Kuching, Samarahan, Limbang, Lawas enggau Mukah.
“Nengah operasyen tu, Bomba Sarawak nyentuk diatu udah mindahka 4,283 orang ke tasah ketegal ampuh bah ngagai palan pengenduh sementara serata nengeri,”ku iya.
Nor Hisham mansutka jaku tu ba seiti aum pengarang berita pengudah ngenataika Pesan Taun 2015 ari Ketuai Direktor Bomba ke mega nyadi pengawa ngelekat tanda pangkat di Indu Opis Bomba Sarawak, Tabuan Jaya ditu, ensanus.
Dalam timpuh enam hari nya, iya mega madahka Balai Bomba ba genap pelilih menua ti bisi betapi enggau penusah bah udah mujur mindah 19 iku orang sakit.
“Operasyen nyelamat bejalai enggau lanchar ketegal mensia mayuh meri kerejasama manah lalu nadai seiku dikemendar nguan rumah ke dipasuk ai, ku seraya ti madah ai pasang besai ti tau ngujungka ampuh bah disadang nyadi nyentuk ngagai Hari Minggu tu.
Balai Bomba Serian mindah empat iku orang sakit ke alai balai Bau, Lawas, Batu Lintang bela mindah tiga iku lalu balai Limbang, Petra Jaya enggau Lundu bisi mindahka dua iku, tandu iya.
Ngenang kaul ke sama, Nor Hisham madah Opis Bomba Sarawak udah disikap enggau semilan iti lori sereta tujuh entukar 4WD nambah perengka dikena nyelamat ke diatu.
Nambahka nya, iya mega madah Opis Bomba Nengeri deka nerima 21 iti entukar ambulan ba bulan Mac 2015 tu.
“Semua 21 entukar ambulan deka diengkah ba Balai Bomba Gred A enggau B aja. Berindik enggau nya kitai deka nambah penyampau tubuh unit paramedik Bomba di serata nengeri.
“Diatu, kitai semina bisi 88 iku tubuh ba unit paramedik,’ku iya seraya ke madah semua perengka baru nya diberi ngambika tau nyaup penengkeman serbis Opis Bomba Sarawak.