Mayuh ejensi nyaup ngemujurka projek perintah

0

Tuju perintah ngaga atur baka tu ngambika rayat enda kelalu lama nganti projek tu tembu

JULAU: Projek perintah dikemujurka nengah mayuh bengkah ejensi ngambika jampat tembu, ku Sapit Menteri Pemansang Menua Pesisir enggau Kandang Menua Datuk Alexander Nanta Linggi.

Pekara tu, ku Nanta chukup seriris enggau rambai jaku perintah ‘Rakyat Didahulukan, Pencapaian Diutamakan’.

“Ambika chunto, diatu ukai semina Sesco aja ulih nyendiaka karan ngagai rayat di Sarawak. Tang Kaunsil Penyanding Penemu Sarawak 1Malaysia (1MSAC) mega ulih ngagai mini hidro mikro awakka ulih mekalka kuasa karan ngagai rumah panjai ke jauh di entigis menua ulu,” ku iya rambau bejadi Pengerami Ketuai Begulai Enggau Rayat di Rumah Mengiring Masil ba Lepong Bilat, Ulu Mujok ditu kena hari Enam tu tadi.

Pengerami nya diatur Opis Pekara Khas (JASA) enggau Parti Pesaka Bumiputera Bersatu (PBB) Pampang Meluan.

Program nya mega digulu Chairman 1MSAC ke mega Kaban Parlimen Julau Datuk Joseph Salang Gandum, Pemancha Janggu Banyang, Chairman PBB Pampang Meluan Kaunsilor Paulus Banyang, Chairman Parti Demokratik Progresif Sarawak (SPDP) Pampang Meluan Belayong Jampong enggau staf JASA Parlimen Julau, Sylvester Embuas.

Ba pengerami nya, Nanta enggau Salang diberi basa bejadi projek bekal ai paip ngagai rumah panjang 24 pintu kelimpah bejadi PBB Pating Ulu Mujok.

Kaban Parlimen Kapit nya mega madah, projek ai paip nya dikemujurka mayuh bengkah ejensi.

“Bajet tu endang ari opis menteri aku tang pengawa nya dikemujurka Opis Pengerai Julau ngambika rayat enda kelalu lama nganti projek tu tembu,” ku iya.

Ngenang pekara bukai, iya ngelalau rayat anang nejuka tanah enda dikemansang.

“Kita tau bulih duit enti tanah nya ditanamka getah enggau lada,” ku iya seraya madah bisi ejensi perintah ulih nulung kita ngemujurka pekara nya.

Ba pengerami nya, iya madahka diri deka meri geran RM10,000 ungkup JKKK Rumah Mengiring enggau RM5,000 ungkup PIBG SK Nanga Ju.