Dikarang Judan Bungap//
SONG: Sekretari Politik Kepala Menteri Tengku Gruna bebulaka penemu ti ngumbai iya beambi ulih ari Program Perintah Begulai Enggau Rayat ke diatur ngelama tu dikena nyaguka diri nyadi chalun Barisan Nasional (BN).
Iya madah, program nya nadai tuju bukai tang endang deka nyaup ngangkatka pengidup rayat menua pesisir.
“Sapa chalun BN nya bepanggai ba ketuai Barisan Nasional”.
“Pia mega aku enda setuju laban bisi sekeda madahka program ti diatur ngelama tu bekaul enggau penyakal,” pia ku iya madah maya Program Perintah Begulai Enggau Rayat ba Rumah Chenggai, Nanga Tenggangai, Sungai Tekalit, Song, empai lama tu tadi.
Nambahka nya ku iya, tanggungpengawa nyadi Sekretari Politik Kepala Menteri ukai semina nitihka pejalai Kepala Menteri aja tang nurun betemu enggau rayat mendingka penusah ke ditapi seraya nyadung polisi perintah.
Iya madah, program ke diatur ngelama tu endang dikemendar Opis Kepala Menteri laban tuju enda ke bukai munyika peragam sekeda ti nguji malut runding rayat dia bela enda nyukung program nya.
“Nya alai, program tu digelar kitai Program Perintah Begulai Enggau Rayat ukai Program Pemesai Begulai Enggau Rayat”.
“Penemu madahka aku deka bekimpin ba program tu enda amat,” ku iya madahka baru.
Serak tu program ke diatur nya bela disempulang Opis Menteri Betanam Betupi Moden (Tanaman enggau Perikanan Darat), Opis Lada Malaysia, Opis Koko Malaysia, Opis Betanam Song, Opis Bomba, Opis Pengerijiter Bansa, Opis Tanah enggau Survei, Polis enggau Insitut Kemahiran Industri Melaka (IKIM).
Tengku madah, penatai ejensi enggau opis perintah nyempulang program nya deka mai mayuh penguntung ngagai rayat menua pesisir ba pekara ngangkatka penatai pemisi.
Ambika banding ku iya, baka Opis Menteri Betanam Betupi Moden bekunsika tuju opis sida kelimpah mantaika chara betanam ti baru ngagai rayat rumah panjai.
Pia mega ku iya, baka IKIM ti nerangka pengawa nampung pelajar ba palan nya ti engkeman ditemu nembiak ke udah tembu belajar naka Pom Lima.
“Nya alai, sida ke enda datai ngulu program tu deka rugi lalu tinggal penemu ari orang bukai semina ketegal alah jamah jaku umbuk orang,” pia ku iya madah.
Berindik ari pekara nya, Tengku ngarapka rayat ba DUN Katibas badu agi ngembuan penemu ti salah ngambika polisi perintah baka tuju program sida ulih diatur enggau mujur ti nyengala mai mayuh penguntung ngagai rayat rumah panjai.