KUCHING: Sebengkah chara nagang pengerusak rampa menua sereta penusah ke ditapi mensia mayuh pindah lebuh ngaga tekat ai besai, iya nya ngaga dinding konkrit ba kededua piak peninggi tekat ai nya empu, ngambika tanah dia enda rusak sereta komuniti enda betapi penusah kena pindah.
Menteri Besai ke dulu suba, Tun Dr Mahathir Mohamad mansutka penemu tu lebuh dipinta ngenataika runding iya berebak enggau pengawa bejadika ‘International Energy Week’ 2015 di Palan Aum Besai Borneo (BCCK) ditu kemari.
“Kitai patut beratika pemisi kuasa bukai. Lebuh kitai bejuraika pemujur kuasa, kitai berundingka pemisi hidro di Sarawak, ke nyadi peluang ke pengabis besai di Malaysia,” ku iya lalu nambah, pemesai kuasa hidro di Bakun, Sarawak, tau disambung ngagai semenanjung,” ku iya lalu nambah menua enda ulih semina bepanggai ba petroleum, minyak enggau gis aja, lebih agi beratika rega minyak udah jauh nurun, tang betatika pengeraja asal bukai ke tau dikena nyadi kuasa.
Tang taja pia, iya madah penemu ngaga tekat ai ba sitak menua ke mayuh sungai endang penemu ke manah, tang enti ulih, anang masau tanah, kayu sereta enda ngenusahka mensia mayuh ke diau besemak enggau teka ai nya.
“Baka di Kelantan, ampuh bah ke nyadi di sitak menua nya bedau lama tu tadi, balat agi nuntung ari penusah Tsunami,” ku iya.
Mahathir besemaka sebuah sungai di Austria, iya nya Dunade River ke mayuh tekat ai, nyangka bisi dalam 10 buah teka ai ke mit-mit ba sungai nya.
“Ukai sema ngaga tekad ai, tang niti tekad ai nya digaga sida iya dinding peninggi tekat ai nya empu be kededua piak tekad ai nya, datai ngagai ujung sungai.
“Kebuah sida iya ngaga dinding tekat ai nya, ngambika tebing-tebing nya enda ampuh. Enggau chara nya, tanah, kayu sereta mensia mayuh ke diau di tebing sungai nya enda dikachau tauka enda ibuh bepindah, tanah sereta kayu pan enda punas. Tanah alai betanam betupi pan agi ulih endur bekebun,” ku iya.
Tang di Malaysia, ngaga tekat ai siti penemu ke manah tang ngampuhka semua sitak nya enggau ai, iya ukai semina ngerusakka rampa menua tang mega ngachau komuniti ke udah lama diau dia, ku iya.
“Tang enti kitai ulih ngaga dinding ba kededua piak, kitai enda ibuh ngampuhka tebing-tebing sungai nya. Tang nyangka ungkus ngaga peninggi dinding nya deka ngena belanja ke besai, Perintah Menua tau berundingka penemu nya.
“Nya deka nyelamatka tanah, sereta kampung kitai. Kepala Menteri Sarawak beratika pengawa betebang pun kayu enggau chara salah, penemu nya sigi amat laban pengawa betebangka pun kayu deka mai mayuh agi penusah ari kitai ke lenyau tanah,” ku iya.
Ngaga tekat ai ke mayuh nya manah, laban nya meri kuasa ngagai kitai, lalu nambah enggau nya, kira ke pechuma, laban menua tu mayuh ai, ku Mahathir, lalu ngarapka menua tu deka nyapai 2,400 megawatt manggai 2020 ila.
Menteri Pengatur Pemansang Pengeraja Asal enggau Rampa Menua II Datuk Amar Awang Tengah Ali Hassan ke ngarika Kepala Menteri Sarawak madah, penemu ti diberi Mahathir nya tau diperundingka.
“Penemu nya manah lalu tau diperundingka kelebih agi enti deka ngaga dinding ba kededua piak tekat ai nya deka ngena ungkus ke besai…Nya alai, awakka penemu nya dipejuraika kami dulu,” ku Awang Tengah madah maya dikerandau pengudah atur pengawa nya.
Entara pemesai ke bisi ngulu atur pengawa nya kemari, Sekretari Nengeri Sarawak Tan Sri Datuk Amar Morshidi Ghani, Chairman Tenaga Nasional Berhad (TNB) Tan Sri Leo Moggie, Menteri Muda Pemansang Perengka Guna Mensia Mayuh (Bekal Ai), Datuk Sylvester Entrie, Menteri Muda Pemansang Nembiak Datuk Abdul Karim Rahman Hamzah enggau Direktor Sarawak State Planning Unit Datu Ismawi Ismuni.