Dikarang Rengenyan Labang//
KOTA SAMARAHAN: Opis Menteri Sains, Teknologi enggau Inovasi (MOSTI) benung chakah meri penyedar sereta ngerembaika projek Off-Grid lebih agi di menua pesisir ti bedau datai kuasa karan.
Menteri iya, Datuk Dr.Ewon Ebin madah, berebak enggau tu, opis menteri iya ngiga chara ngemanahka sistem nya.
Iya madahka projek Off-Grid ti dipejalaika di menua tu nyengkaum nengah sistem solar, minihidro ,mikrohidro enggau kuasa angin.
“Diatu kitai benung chakah deka ngerembaika projek Off-Grid lebih agi nengah Smart Village Initiative ba menua ti bedau sereta tusah deka datai kuasa karan. Pekara tu benung dipansik.
“Berebak enggau tu kami mega deka ngiga chara engkeman dikena ngemanahka sistem nya lebih agi baka solar ti sebedau tu begunaka kos kena ngemanah sistem nya ngambika lebih tinggi,” ku iya.
Ewon mansutka pekaranya dalam aum pengarang berita pengudah bejadika Smart Village Initiative and Workshop On Energy For Off-Grid Villages in Southeast Asia ti diatur ba DeTAR Putra, Universiti Malaysia Sarawak ditu lemai kemari.
Berindik ari pengawa deka ngenyakah sereta ngerembaika projek Off-Grid, pengawa ngumpul perambu, penerang enggau data benung dipejalaika nengah woksyop nya ti dipejalaika 27 ngagai 29 Januari ba UNIMAS ti diatur UNIMAS enggau Akademi Sains Malaysia.
“Tuju worksyop tu diatur endang dikena ngiga penerang, bekunsi peneleba enggau penemu ari semua pesereta worksyop ari serata menua ngambika kitai nemu bagi projek Off-Grid ke senipak sereta menua ti ulih endur bejalaika projek tu.
“Ba Sabah enggau Sarawak agi bisi kandang menua kebedau bisi kuasa karan, nya alai tuju kitai meri projek tu ngambika peranak menua ulih ngasaika pengelantang nengah projek tu,”ku iya.
Kelimpah ari nya iya madahka opis menteri iya bisi bejalaika pengawa pemansik dikena ngemanahka sistem baka sistem solar ti lebih manah dikena dimenua tu sekalika ari United State, Jerman tauka ari menua bukai.
“Kami bisi nyendiaqka ungkus belanja dikena bejalaika pengawa pemansik nya, sereta bepanggai ngagai keretas kereja. Kami nyendiaka belanja urung RM200 miliun,” ku iya.
Kelimpah arinya lebuh ditanya pemayuh projek Off-Grid dikena, Menteri Muda Dagang Temuai Datuk Talip Zulpilip madahka, di Sarawak agi kurang.
“Di Sarawak agi mayuh laban orang agi kurang andal tauka arapka Off-Grid. Teknologi lama kekadang jai lalu pengawa ngemanah pan tusah.
“Diatu aku arap bendar teknologi majak manah sereta sistem dikena ngemanah pan kurang,” ku Talip.
Bisi dataiba pengerami nya Presiden Akademi Sains Malaysia Tan Sri Dr. Ahmad Tajuddin AliFASc, Senior Advisor for Smart Villages/CMEDT Professor Brian Heap enggau kebukai.