Dikarang Chris Bishop//
MAYUH PROJEK DEKA BERENGKAH: Fadillah (duduk kanan) bejaku ngagai pemberita seraya dipendingka Manyin.
KUCHING: Projek sepital baru Sri Aman ti udah disemaya digaga kenyau pengawa bepilih nengeri taun 2011 suba deka belabuh dikereja taun tu.
Menteri Kereja Raya Dato Sri Fadillah Yusoff madah, pengawa nasih taba projek ke beungkus RM200 juta nya deka diatur bulan Februari tu.
“Kitai deka berengkah ngaga sepital baru Sri Aman enda lama agi, tinda projek nya udah lama dibuka lalu diatu udah ditutup.
“Pengawa nasih tanah taba projek nya deka diatur ba timpuh ke semak, enti nadai penanggul nyangka entara 26 tauka 27 Februari tu,” ku iya.
Fadillah mansutka jaku tu ba sebengkah aum pengarang berita pengudah bejadika Board of Engineers Malaysia (BEM) RoadShow 2014/2015 ba sebengkah hotel ditu, ensana.
Digaga ba tanah pemesai 50 ikar, sepital baru nya ila disadang deka nganti sepital lama ti ditumbuh kenyau taun 1959 lalu deka mai pemaik ngagai urung 200,000 peranak Sri Aman.
Ngenang sekeda projek besai ti deka digaga di Sarawak dalam taun 2015 tu, Fadillah ke mega Kaban Parlimen (MP) Petra Jaya madah projek ngemanahka Jalai Kuching ke Serian iya nya ari Bt 10 ngagai Bt 15 deka belabuh enda lama agi.
“Projek ngemanahka jalai ari Bt 10 nuju Bt 15 ke beungkus RM80 juta udah dikemendar lalu deka belabuh dikereja.
“Opis Kereja Raya (JKR) ke megai tanggungpengawa projek tu udah ngatur lab kenaka 4 – 6 November 2014 tu tadi lalu konsultan udah dipadu ke alai kitai napi pemar ba kereja mindah paip enggau kabel baruh tanah.
“Jalai tu deka dikemanah nyadi jalai dua gembar, dua alur pejalai,” ku iya nambah.
Entara projek bukai tandu Fadillah iya nya projek ngemanahka jalai ari Simpang Nyabau ngagai Simpang Bakun, Bintulu nyadi jalai dua alur, dua tunga pejalai sereta kereja ngemanahka jalai Pan Borneo ti disadang berengkah 30 March taun tu.
Projek ngaga Jematan Batang Samarahan benung nganti pemendar ari Opis Menteri Pekara Wang lalu tinda projek ngaga Jematan Meraka Jalai ba UNIMAS deka dikeluar pengujung bulan Januari tu, tandu iya.
“Kelimpah ari nya, kitai deka nembuka pengawa ngaga 22 lurung endur mutung ba sepemanjai Jalai Pan Borneo, Kuching ke Lawas dalam timpuh taun 2014 ngagai 2015,’ ku iya.
Bela datai Menteri Pemansang Infrastruktur enggau Penyambung Dato Sri Michael manyin enggau Direktor JKR Sarawak Ir. Zuraimi Sabki.