Projek Jalai Ng Dap-Ng Jagau deka ngelantangka 150 buah rumah panjai

0

JULAU: Pengawa ngaga projek Jalai Nanga Dap-Nanga Ngungun-Nanga Jagau di Kanowit ke tepagang ukai ketegal penanggul ari perintah tang kompeni batang.

Sapit Menteri Pemansang Menua Pesisir Enggau Kandang Menua Datuk Alexander Nanta Linggi madah, ke bendar penanggul nya bepun ari kompeni batang ti ngaku deka ngaga projek nya laban sida ngasaika diri megai tanggungpengawa ngemanahka jalai nya dikena sida ngangkut batang ngelama tu.

“Taja baka nya, Opis Menteri Wang enda ngemendarka sida laban nadai lisin dikena ngaga jalai nya lalu tu ngasuh projek nya tepagang ”.

“Tang diatu Kepala Menteri Datuk Patinggi Adenan Satem terang madah kompeni kem batang nadai pemendar madahka jalai ke dikena ngangkut batang enggi sida”.

“Aku deka bebendar mutarka pekara tu ba aum kami minggu dudi ila ngambika projek nya ulih berengkah,” ku iya.

Iya mantaika jaku nya maya bejadika Pengerami Ketuai Begulai Enggau Rayat di Rumah Mengiring Masil ba Lepong Bilat, Ulu Mujok ditu, ujung Minggu nyin tadi.

Projek jalai ke beungkus RM8 juta nya, ke panjai 22 kilometer, dipadah Menteri Besai Datuk Seri Najib Tun Razak ngagai mensia mayuh maya ke nemuai ngagai Rumah Matthew Chuat di Nanga Tada kena bulan Februari 2010 suba.

Pekara nya kala dibantai Kaban Kunsil Nengeri (ADUN) Ngemah Alexander Vincent maya ba sebengkah pengerami di Kanowit pun taun tu tadi.

Iya madah, rayat ba menua nya udah kelalu lama nganti kenyau ke udah ninga perintah besemaya deka ngaga projek jalai nya sebedau Pengawa Bepilih Kunsil Nengeri 2011 suba.

Ku iya, penembu projek nya ila deka ngelantangka urung 150 buah rumah panjai lalu pampas udah disua ngagai orang ke beempu tanah ti kena tujah projek nya ba taun 2012 suba.

Nanta ti mega Kaban Parlimen Kapit maya tu madah, perintah ngembuan mayuh chara dikena ngaga projek jalai alun ke lebih agi ba menua pesisir nyengkaum pengawa ngemanah jalai kem batang enggau projek Jalai Penyambung Genturung Pendiau (JPD).

“Enda semua jalai kem batang engkeman digagaka jalai alun laban tebal agi jalai nya jauh ba puak kampung.

“Baka JPD, perintah deka bekenaka ungkus ti mit lalu nadai mayar pampas ngagai rayat enda baka projek ti digaga Opis Kereja Raya (JKR) ti suah agi bekenaka timpuh ti lama enggau ungkus ti besai tang rayat ke bisi tanah kena tujah projek endang diberi pampas ke besai,” pia ku iya madahka baru.