Dikarang Jacqueline David//
KUCHING: Sebuah menua ke ngemeranka pemansang industri ukai semina ulih nyapai penatai pemisi tinggi tang mega nyeliahka pengerusak rampa menua.
Menteri Besai Malaysia ke dulu suba Tun Dr Mahathr Mohamad madah, industri patut dikemerat laban enda begunaka tanah besai.
“Enti kitai ngira pemesai tanah kena betanam betupi, tentu enda ulih nyukung mayuhy mensia ngulihka penatai pemisi tang enti sema digagaka kilang besai ba tanah ke sebaka pemesai tentu ulih meri penguntung besai ngagai urung 500 iku pengereja pengawa, nya mega bepanggai ba gaya industri ti dibuka,” ku Mahathir.
Iya madah munyi nya lebuh bejaku maya ‘International Energy Week’ 2015 ti digaga di Palan Aum Besai Borneo Kuching (BCCK) ditu, kemari, alai atur pengawa nya dipejadika Kepala Menteri Sarawak (diarika Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hassan).
“Kitai dipajak ngambi pengereja pengawa ari menua luar tang enti kitai amat-amat deka nyadi menua industri, kitai patut beratika industri ke kurang begunaka pengereja pengawa tang ngena teknologi tinggi.
“Kitai patut nemu milih laban enti sema kitai meri pengawa nya ngagai orang kitai empu, sida bulih penguntung ari nya,” ku iya.
Kelimpah ari nya, orang menua luar ke deka beranakka puku di menua tu, tentu deka meda perintah kitai tegap.
“Sekeda menua enggai beranakka puku di menua bukai laban nangika polisi perintah betukar, tiap kali pengudah pengawa bepilih selalu iya polisi perintah mega betukar, tu tau nyadi penanggul.
“Lebuh kitai betukar Perintah, iya deka ngachau pejalai pengawa perintah, nya pemun ke patut diperundingka dulu,” ku iya.
“Kitai enda begunaka pengereja pengawa ‘manual’ tang begunaka pengereja pengawa ke bisi untak. Nya alai, orang di Sarawak sereta di sitak menua bukai, enda tau enda bisi pelajar tinggi.
“Kitai beguna injinir, juru teknik sereta pengawa profesyenal bukai. Tu gaya orang ke patut gawa ba industri kitai,” ku iya.
“Orang ke bepelajar, chukup latih sereta perintah ke seruran ngemeratka industri, milih ni bagi industri ke patut, Sarawak deka nyadi menua industri ke besai,” ku iya.
Ba tanya pasal ‘Royalty’ minyak ditikika ngagai 20 persin, Mahathir madah, pekara nya patut dibai baum enggau Menteri Besai (PM) Datuk Seri Najib Tun Razak.
“Bai berandau enggau PM, lalu tanya ngagai iya enti penguntung nya ulih dikunsi. Enti minta 20 peratus nya pelaba aku kelalu besai…Tang enti 6 peratus tauka lebih ari nya, jangka aku nadai penanggul tang patut dikunsi. Ungkup ‘Royalty’ ke menua bukai pelaba aku pan atut dipeda baru, laban sekeda sitak menua meskin lalu begunaka mayuh agi ungkup.
“Nya alai, kaul belanja tauka ungkup entara Sarawak enggau perintah besai patut diperatika baru. Nya penemu sereta sadang aku ngagai kita (Sarawak). Aku tetap nyukung kita,” ku iya.
Mahathir nyaut tanya pasal nyadi menua industri sereta ‘Royalty’ minyak lebuh nyaut tanya ari Direktor Opis Unit Perambu Menua (SPU) Datu Ismawi Ismuni dalam sesi tanya saut pengudah Mahathir bejaku ba ‘International Energy Weeks’ 2015 nya.