SRI AMAN: Peranak rumah panjai di nengeri dipinta anang ngelepaska peluang nginjau duit dikena ngaga tauka ngemanahka rumah panjai ari Opis Menteri Pengawa Berumah Sarawak ke dikena mantu sida ngemanahka rumah panjai sida.
Menteri Muda Pengawa Berumah Sarawak, Datuk Francis Harden Hollis madah, peminta ke duit jali rumah panjai nya tau dikenataika sida empu ba opis menteri nya di Kuching.
“Kelimpah ari nya, rumah panjai ke bisi minta duit jali nya tau mega ngagauka bala pemesai kami ari opis ngambika datai meri penerang ngagai sida di rumah panjai ke bisi ati nginjau duit nya,” ku iya.
Harden ke mega Kaban Kunsil Nengeri (ADUN) Simanggang bejaku munyi tu lebuh bejadika pengerami Ketuai Begulai enggau Rayat di Rumah Ayum, Ensurai ditu kemari.
Ku iya, tetiap rumah panjai ke minta duit jali tu deka diberi RM 15,000 ngambika bisi dikena meli perengka berumah.
“Peminta ke dikemendar enda tau enda dibayar pulai RM 72 sebulan dalam timpuh 25 taun.
“Asai kami, orang ke nginjau duit tu nadai penanggul mayar pulai RM 72 sebulan laban penyampau nya mimit aja ,” ku iya.
Ku Harden, rumah panjai ke bisi ati nginjau duit nya enda tau enda 10 pintu ke atas.
“Sebedau tu, duit jali ti dikemendarka opis menteri nya semina RM 10,000 aja lalu deka dibayar pulai RM 65 sebulan dalam timpuh 25 taun,” ku iya.
Ku iya baru, dalam taun 2014 opis menteri nya mega bisi nyediaka seiti agi pakej baru duit jali dikena ngaga rumah panjai iya nya ‘Pakej Pinjaman Perumahan Rumah Panjang Mesra Rakyat’.
“Nya sebengkah ari sekim duit jali dikena ngaga rumah panjai ke baru ti udah dikemendarka Opis Menteri Pengawa Berumah,” ku iya.
Bela bisi ngulu pengerami nya, Pemesai Bomba Sri Aman, Jilin Itar, Sekreteri Majlis Daerah Sri Aman, Nelson Mujah Girie, Tuai Rumah Roy Edward Entalai ari Genturung Pendiau Selindong Ili enggau bala pemesai perintah ke bukai.
Beserimbai enggau pengerami nya,Harden lalu ngungkupka belanja RM 5,000 ngagai Komiti Pemansang enggau Pengelikun Genturung pendiau (JKKK) Rumah Ayum lalu RM 3,000 ungkup Biro Indu rumah panjai nya.
Ba pengerami nya mega, Harden lalu nyuaka anak manuk ari Opis Menteri Betanam Betupi Sarawak Bagi Menua Sri Aman ngagai peranak rumah panjai nya.