Dikarang Rengenyan Labang //
Gerempung tu ngasaika pengajar Jaku English di menua tu patut dianjung ngambi kos jaku nya
KUCHING: Atur ti dipejalaika Opis Menteri Pelajar Malaysia (KPM) ngena pengajar Jaku English (BI) ari Amerika Syarikat (AS) kena nyaup ngenegapka pengelandik nembiak sekula di nengeri tu nguasa BI endang disukung sereta diterima Gerempung Pengajar Bumiputera Sarawak (KGBS).
Presiden gerempung nya, Ahmad Malie madah, nya ulih meri peluang ngagai nembiak ditu terus betunga mua enggau orang ti ngempu penulin jaku nya.
Taja pia ku iya, KPM patut nganjung pengajar BI ngambi kos sekalika diatur di menua tu tauka menua tasik, ke guna sereta penguntung timpuh panjai.
Iya madah, perintah tauka KPM enda patut terus bepanggai ba pengajar BI ari menua tasik.
“KGBS nerima manah penyakah KPM ti deka ngenegap pengulih enggau pengelandik nembiak sekula dalam BI nengah pengawa ngena pengajar BI ari Amerika Syarikat nya.
“Chara nya amat manah laban orang ke ngempu penulin jaku nya ulih betunga mua sereta mantu nembiak nguasa pengelandik dalam BI.
“Taja pia, KGBS ngansak KPM nganjung pengajar BI menua tu ngambi kos sekalika diatur di menua tu tauka ukai, nyadika alternatif pengawa ngenegapka nembiak sekula nguasa BI. Ngelatih pengajar BI menua tu empu deka meri impak dalam timpuh ke panjai,” ku Ahmad madah ngagai Utusan Borneo.
Ahmad mansutka pekaranya lebuh dipinta meri penerang bekaul enggau atur KPM ti ngena pengajar AS ngenegapka BI nembiak menua tu.
“Enti diperatika ari ungkus belanja, tentu lebih ngelimat belanja perintah lebih agi KPM enti ngelatih pengajar BI menua tu,” ku iya.
Taja pia penemu KGBS ti baka nya ukai reti KGBS enda setujuka atur ti udah dipejalaika perintah.
“Dalam kitai ngena servis sida (pengajar BI menua luar), kitai patut nyikap pakar BI kitai empu ke guna timpuh panjai,” ku iya.
Nitihka ripot surat kabar ensanus, bisi 15 buah sekula sekondari serata Sarawak deka nerima penguntung ari pengajar Amerika Syarikat (AS) di baruh program ‘Pembantu Pengajaran Bahasa Inggeris (ETA) Fulbright’ dikena ngenegapka pengelandik nembiak sekula dalam BI.
Sekula ti dipilih nyereta program nya nyengkaum SMK Bandar Semariang, SMK Semerah Padi, SMK Muara Tuang, SMK Kota Samarahan, SMK Batu Kawa, SMK Siburan, SMKTaee, SMK Serian, SMK Tarat, SMK Tasik, SMK BAU, SMK Lundu, SMK Sematan, SMK St Luke enggau SMK Melugu.
Menteri Pengintu Pengelantang Pendiau,Orang Indu enggau Pemansang Ruang Bilik Datuk Fatimah Abdullah madah, pengajar ETA nya dianjung ngajar ba sekula ke dipilih nyentuk bulan Oktober taun tu.
Fatimah madah, tuju program nya endang sebagi agi pengawa dikena ngenegapka pegelandik enggau pengulih dalam BI di Malaysia senipak enggau Pelan Induk Pembangunan Pendidikan Malaysia (PIPPM) 2013-2025.