Dikarang Jacqueline R. David //
Ripot deka digumpul kena ngulih penyampau pengerugi ke ditapi mensia mayuh ketegal tasah nya
KUCHING: Semua Residen Pelilih Menua di Sarawak dilalau ngumpul penerang tauka ripot pansik bekaul enggau sebarang pengerusak ti bisi nyadi ketegal penusah ampuh bah bedau lama ke udah, ba kandang menua ke dikuasa sida.
Sapit Kepala Menteri Datuk Patinggi Tan Sri Alfred Jabu Numpang madah, genap Residen dipinta ngumpul penerang nyengkaum pengerusak utai ke ditanam, jelu ke ditupi sereta reta tengkira ke rusak laban bah.
Udah nya, penerang tu patut dianjung ngagai Opis Kaunsil Pengelikun Nasional (MKN) enggau Komiti Mantu Tasah Menua.
“Kami deka beratika semua penerang tu, udah nya ripot deka dianjung ngagai Perintah Besai bekaul enggau bantu ke patut diberi ngagai rayat di nengeri tu,” ku Jabu nguluka aum media sepenembu Aum Komiti Mantu Tasah Menua di Bilik Operesyen di Wisma Bapa Malaysia ditu, kemari.
Ku iya, aum deka diatur bejuraika pekara nya begulai enggau bala Residen dalam kandang 10 hari tu ila.
“Kitai nganti dulu semua penerang pasal penusah ampuh bah ba sekeda sitak, enti ai udah nyengala surut baru kitai muntang bejalai meresa sereta mansik barang, perengka, utai tanam, utai tupi ke bisi rusak tauka mati laban ampuh bah. Udah nya baru nyamai kitai berundingka ni naka penyampau pengerugi sida,” ku iya.
Kelimpah ari nya, Jabu ti mega Chairman Komiti Mantu Tasah Menua madahka pemayuh palan alai mindah mensia mayuh ke betapi enggau ampuh bah diatu udah kurang, lalu semina empat buah aja ke agi dibuka (naka pukul 4 lemai kemari).
“Ari gaya mua hari nyau majak manah, pelaba aku semua palan tu deka ditutup magang,” ku iya.
Iya nandu baru, taja pan mayuh sitak menua tu udah belinsur manah, tang jalai tama ngagai Bukit Setiam di Bintulu, agi bedau ulih dtengah laban tanah tusur ke bisi nyadi dua hari tu tadi.
“Rumah tinggi nya ke begunaka diesel ngidupka injin api, likun tang jalai agi enda ulih ditengah.
“Diatu, jalai nya benung digaga baru, lalu aku pan bisi dipadahka Residen ba sitak nya, diesel injin api dia agi chukup lalu sebarang bantu ngundan diesel ngagai rumah tinggi nya deka digaga nengah Opis Residen sitak nya, ngambika minyak diesel dia seruran chukup,” ku iya.
Gaya mua hari di Sarawak, ku Jabu dipeda manah dalam kandang tiga hari tu.