NGANTI TEREJUN: Gaya tanah ti tusur sereta tau nabanka rumah enggau injin api rumah panjai nya.
KAPIT: Pengudah ninga berita penyadi tanah tusur ditapi peranak Rumah Weng, Sungai Mujong nebing Batang Baleh ditu, Kaban Parlimen (MP) Hulu Rajang Wilson Ugak Kumbong berumban ngesah penusah nya.
Bela bisi nyempulang iya bejalaika pengawa nya, Kepala Opis Pengerara Api (Bomba) enggau Penyah Penusah Kapit Erwandy Tugor, Penguasa Opis Pengintu Pengelantang Pendiau Mensia Mayuh Peter Gabong, Ketuai Pengatur Pengawa Opis Residen Kapit Minggu Jampong, Injinir Opis Kereja Raya Kapit Hassan Ayaw sereta staf ari Rimbunan Hijau Sdn Bhd.
Berindik ari randau sida begulai enggau MP nya, dia Rimbunan Hijau nengah Tanggungpengawa Rama Kompeni (CSR) nya besetuju deka ngatur kereja ti patut kena nagang tanah ti tusur nya enggau jampat.
Ugak mega muji semua piak ketegal jampat bejalaika atur ti patut sebedau sebarang penusah ditapi peranak rumah panjai nya.
Tanah nebing mua rumah panjai 23 pintu nya berengkah tusur berindik ari ujan bangat sereta ai deras nuju tebing Sungai Mujong nya.
Enti enda diputar enggau jampat dia tanah mua rumah enggau injin api sida tau ditabanka tanah tusur.
Tiap taun maya lumba Rakit Baleh/Kapit, rumah panjai tu mih endur penyereta belelak nyinggahka diri.
“Pengerusak tanah tusur nya patut diputar dulu sebedau kitai berengkah ngatur pekit Rakit Baleh/Kapit kena 11 enggau 12 April 2015 tu,” ku Ugak
Berebak enggau nya, iya mega ngemendarka 4 buah injin api, 20 iti kipas siling, batang paip sereta sekeda perengka berumah diungkup ngagai rumah panjai nya.
Ngarika peranak rumah panjai nya, Tuai Rumah Weng ngenataika pengaga ati diri sereta meri besai terima kasih ngagai kaban parlimen Ulu Rajang nya.