SIBU: Bisi 1,000 iti kantung sekula disadung ungkup nembiak 19 buah sekula di sitak Kunsil Nengeri (DUN) Tamin.
Kaban DUN iya, Datuk Joseph Mauh Ikeh madah, dikearap nengah bantu kantung sekula nya ulih ngelempungka tating belanja bala apai indai.
“Kitai nemu bala apai indai begunaka mayuh belanja dikena ngepunka anak besekula, nyengkaum bepungkalka kantung sekula,” ku Mauh.
Iya mega ngelalau bala apai indai nembiak enggau pangajar numpuka pekara pelajar dikena nempa modal mensia ke menyana.
“Pemandai sekula senjata ke pemadu bereha,” ku iya seraya ngabas Sekula Primari (SK) Sungai Siong Ili ke bisi kena penusah angus kuarters pengajar empai lama ke udah.
Iya mega bisi nyuaka bantu geran projek mit pemansang menua pesisir (MRP) RM5,000 enggau RM5,000 ari Wang Turu Bantu Tasah Ngenyit.
Kelimpah ari nya, Mauh bisi ngelalau bala Tuai Rumah di Tamin seruran berandau enggau ejensi perintah dikena mantu rayat ke benung begunaka bantu.
“Tuai rumah patut ngaduka baru profile rumah panjai diri empu ngambika sida muntang mantu nembiak redak ke tusah.
“Tu nyengkaum sida ke nadai tingki enggau bisi begunaka bantu bukai,” ku iya.