Dikarang Rengenyan Labang //
KUCHING: Chairman Parti Keadilan Rakyat (PKR) Sarawak Baru Bian madah, nengeri tu endang patut nerima royalti minyak lima nyentuk ngagai 20 peratus.
Iya madah penyampau nya enda kelalu besai. Nangkan nya, ku iya pekara bekaul deka nambahka royalti nya setipak enggau manifesto parti sereta usul ti udah dikemendar maya aum Kunsil Nengeri apin lama.
Taja pia ku iya penyampau ke dipinta nya baka tusah deka disenurutka perintah besai.
“Aku nyukung penemu nya laban nya udah senipak enggau manifesto kami sereta usul (meresa baru royalti minyak ungkup Sarawak) udah dikemendarka maya aum Kunsil Nengeri apin lama.
“Tang aku arap bendar pekara tauka peminta royalti minyak tu ulih disenurutka perintah besai, enti ketuai megai menua kitai betukar.
“Kepala Menteri kitai (Datuk Patinggi Tan Sri Adenan Satem) udah nusui ngagai Kunsil Nengeri, madahka iya udah berunding enggau perintah besai. Nitih gaya, timbal ari KL enda berapa ngemuaska ati,” ku iya madah ngagai Utusan Borneo.
Iya mansutka penemu nya lebih dipinta meri timbal pasal penerang Tun Dr. Mahathir Mohamad pasal isu royalti minyak maya meri mungkal pengerami Minggu Tenaga Antarabansa (IEW) 2015 apin lama.
Tun Mahathir ti nyadi penyanding penemu Petronas madahka, Sarawak ulih minta nambahka royalti minyak ari lima peratus baka diatu tang 20 peratus nya kelalu besai.
Lebuh dipinta meri penerang nama kebuah peminta 20 peratus kelalu tinggi, Tun Mahathir madahka: “Nya semina ari penemu aku laban rega minyak majak nurun sereta perintah besai nerima duit ti kurang ari Petronas.”