Dikarang Judan Bungap //
SONG: Sekretari Politik Kepala Menteri Tengku Gruna chukup ransing nguluka sekeda ejensi ditu bejalai ngagai rumah panjai ngambika ulih meransang runding rayat di menua pesisir sentang chara nambahka penatai pemisi nengah pengawa betanam betupi.
Empai lama ke udah, Tengku bisi ngulu raban ejensi perintah ngemujurka Program Perintah Begulai Enggau Rayat ba Rumah Chenggai, Nanga Tenggangai, Sungai Tekalit, Song.
Entara ejensi perintah ke bisi ngambi bagi ba program tu iya nya Opis Menteri Betanam Betupi Moden (Betanam enggau Nupi Ikan), Opis Lada Malaysia, Opis Koko Malaysia, Opis Betanam Song, Opis Bomba, Opis Pengerijista Bansa (JPN), Opis Tanah enggau Survei (JTS) , Polis sereta Insitut Kemahiran Industri Melaka (IKIM).
Program ke diatur asil kerejasama enggau Opis Kepala Menteri tu bisi digulu urung 200 iku mensia mayuh peranak menua Song.
Nyerumba program tu, bala mensia ke bisi datai bela bepeluang mendingka licha bekaul enggau tuju sereta polisi ejensi perintah ke bisi datai maya nya.
Sebengkah ari licha ke bisi dibantai maya tu iya nya bekaul enggau chara baru sereta engkeman sentang pengawa betanam betupi ba menua pesisir lebih agi ba menua Song.
Nambahka nya, IKIM mega nerangka pengawa nampung pelajar ba palan nya ti engkeman ditemu nembiak ke badu belajar naka Pom Lima.
Maya ke bejaku ba mua mensia mayuh, Tengku madahka program ke diatur sehari nya tau bendar nambahka penemu rayat rumah panjai ngangkatka tikas penatai pemisi diri.
Iya ngarap bala ke bisi datai nguna penemu ke diulih ari program nya dikena ngubah chara nambahka penatai pemisi sida.
Nya alai, iya mega ngarapka mensia mayuh ulih datai sampal ngulu program ke sebaka ti deka diatur nangkan ke tu ila.
Ngalihka malam, artis Dayak tebilang Rosiana Urai mega bisi datai merindang bala mayuh.