Dua kes timbak dipelaba digaga saspek ke sama

0

SIBU: Dua bengkah kes timbak ke bisi nyadi di palan bebelika barang ditu di Jalai Sanyan sereta Jalai Kampung Nyabor kemari dipelabaka nyadi ari ulah saspek ke sama.

Ketuai Polis Pelilih Menua Sibu, ACP Mohd Kamal Kordi madah, insiden nya dipelabaka digaga saspek ke sama lalu berenggat tang jam enggau maya ke bendar insiden nya nyadi empai ulih dikenukuka sereta agi dipansik polis.

“Aku pechaya ke insiden timbak ke nyadi di dua buah palan bebelika barang tu digaga saspek ke sama. Piak polis benung bejalaika pansik nyidi saspek,” ku iya.

Taja pia, Mohd Kamal enda ngenggaika tuju kebendar saspek ngenataika insiden nya ketegal dendam, sengaja ngaga kachau tauka sengaja ngeruga pengelikun mensia mayuh.

Berindik ari nya, polis diatu benung enggau naka ulih bejalaika pansik sereta dikena nyidi saspek ke betanggungjawap dalam dua kes timbak nya.

Ku iya, sekeda saksi ke bisi tepedaka kes nya nyebut sida semina ninga munyi utai meletup tang nadai meda sapa ke ngaga jenayah nya.

Nitihka pansik ti keterubah, insiden timbak ke nyadi di Jalai Sanyan dipelabaka nyadi urung pukul 2.24 nyentuk ngagai pukul 2.25 pagi.

“Enda patut kededua kes nya nyadi mua ke siang hari,” ku iya.

Berindik ari kes nya, piak polis ngatur sekat jalai alun dikena nyeliahka insiden nya nyadi baru.

Entara atur ke bisi dipejalaika iya nya ngaga sekat jalai alun di lima buah palan di serata mengeri tu.

“Dikena nyeliahka pengawa jai tauka jenayah nyadi, aku udah ngasuh raban polis matau endur ke diuan mensia mayuh nyengkaum palan bebelika barang sereta sekeda palan  bukai ke seruran ditatam mensia mayuh,” ku iya.