Penyerakup pupu bansa ulih dikedut nengah pengerami

0

SRI AMAN: Pengerami Pentas Taun Baru China 2015 ke diatur Radio Televisyen Malaysia (RTM) Sri Aman begulai enggau unit hiburan enggau Muzik RTM Kuching dipeda ulih ngenegapka agi kaul semua raban bansa di nengeri tu.

Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis madah, penatai taun kambin nitihka pengarap kalender bansa China taun tu ngemai reti ke chukup beguna laban jelu nya ngundan reti mandangka penyerakup enggau pengelikun kelimpah ari meri mayuh penguntung.

“Nitihka pengarap raban bansa China, sebarang orang ke ada ba taun kambin nya ngembuan nasit sereta rejeki ke manah, badas runding, lurus sereta siru ke orang bukai.

“Aku ngarapka, beserimbai enggau penatai taun kambin tu, kitai tau bulih tuah ke lebih manah dalam semua pengawa ke dikereja,” ku iya.

Harden madah munyi nya lebuh bejadika Pentas Taun Baru China 2015 di Mini Stadium ditu, malam kemari.

Harden ke mega Kaban Kunsil Nengeri (ADUN) Simanggang madah, pia mega nengah program ke diatur RTM deka ngemai tuah ke belimpah kelimpah ulih ngerapitka kaul entara raban bansa enda ngira China, Melayu, Iban tauka bansa bukai.

“Program baka tu kebendar iya tau nyadika pelasar dikena ngempung kaul entra pemesai raban bansa, ejensi perintah sereta rayat di nengeri tu.

“Aku muji pengeransing raban RTM Sri Aman laban ti udah mujur ngatur program baka tu ke alai program tu ulih ngerapitka kaul RTM enggau semua peninga nengah Program Radio di Lokasi,” ku iya.

“Aku ngarapka RTM terus ngedut kaul enggau rayat nengah program ke tau meri mayuh penemu ngagai rayat kelimpah ari nyendiaka sukut pemerindang,” ku tandu iya.

Nambahka nya, dalam kitai berami nyambut pengerami baka tu, kitai mega patut bejimat dalam nguna belanja laban kitai semua nemu Chukai Barang enggau Servis (GST) deka dipejalaika belabuh bulan April taun tu.

“GST nya sebengkah chukai barang enggau servis. Ba sekeda menua, iya meda dikelala enggau nama ‘Value Added Tax’ (VAT) tauka chukai nilai tambah.

“Ambi ke banding, kaban kitai ke masuk dalam sektor dagang, kebendar iya nengah GST, rega barang deka nyadi lebih murah. Tang enti sema bisi raban orang dagang nyual barang sida enggau rega ke mar ngagai penguna, nya ulah ke salah sereta tau ditinggang ukum ke patut,” ku iya.

Nya alai, enti nyema pekara tu bisi nyadi, rayat tau ngeripotka pekara nya ngagai piak ke ngembuan pematut laban nya hak rayat.

Kelimpah ari nya, kitai petut meretika konsep GST ngambika kitai ulih nyadi mensia ke ngembuan penau sereta pengelandik.

Sama bisi datai ngulu prgram nya, Sapit Direktor RTM Sarawak, Jamel Seman, Menijar Stesyen RTM Sri Aman, Ramli Junaidi sereta pengari Residen Bagi Menua Sri Aman, Noor Hayati Ahmad sereta Chairman Pentas TBC 2015, Francis Linggie Nyaran.