Raban Keristin di nengeri tu nadai nangi ngena jaku ‘Allah’

0

MARUDI: Kepala Menteri Sarawak, Datuk Patinggi Tan Sri Adenan Satem udah nyemetak madahka semua raban pengarap Keristin di nengeri tu enda ditagang nguna leka jaku ‘Allah’, pia ku Kaban Parlimen Baram, Anyi Ngau.

Ku iya, rayat Sarawak ke bepengarap Keristin tau ngena leka jaku nya enggau nadai penangi kelimpah ari ngembuan hak dikena nentuka ni bagi pengarap ke deka dikemeran.

Anyi mansutka jaku nya lebuh ti bejadika Legit Luching Gerija Roman Katolik (RC) Good Shepherd Marudi ke beungkus RM68,000 ba Gerija Good Shepherd ditu, pagi kemari.

Kelimpah ari nya, luching ke beungkus RM10,000 nya asil ari pemeri enggau penyiru seiku raban Kerisitin ke benama Louis Tadong.

Raban pengarap Keristin patut ngangkatka pengidup sida ngambikanyadi mensia ke menyana nyengkaum ngiga penemu ke manah dikena ngubah diri nuju pengidup ke lebih meruan,” pia ku iya.

Pemadu beguna ku iya, raban Keristin patut ngemeranka ulah ke menyana dikena ngulihka pengidup ke menyana.

Nangkanka nya, Rev. Fr. Basir Entili lebuh ti bejaku ba atur pengawa nya mantaika pengaga ati tanda besai terima kasih ngagai perintah Barisan Nasional (BN) ke mega bisi ngungkupka agih belanja dikena mantu gerija nya.

Semua bansa bantu ke diberi perintah ngagai gerija nya chukup besai guna, pia ku Basir.

Beserimbai enggau atur pengawa nya, Anyi bisi nyuaka bantu geran Projek Mit Pemansang Menua Pesisir (MRP) ke beungkus RM20,000 dikena raban gerija nya bejalaika pengawa sepanjai taun.

Sama bisi datai ba atur pengawa nya, Chairman Kaunsil Parish RC Mission, James Chass Gerok sereta Pemesai Opis Pemandah Marudi, Joseph James.