KENA NGATUR PENGAWA: Abang Johari nyain replika chek seraya dikemata Ahmad (kanan).
Barang sapa ti ngembuan pengelandik bejaku ngena bansa bukai muntang besemekih ba renggat dunya
KUCHING: Ngembuan pengelandik bejaku English enggau Mandarin patut dikemerat nembiak ke diatu ngambika ulih nentuka pemujur sida besemekih ba renggat dunya, ku Menteri Dagang Temuai Datuk Amar Abang Johari Tun Openg.Ku iya pengelandik nguasa leka jaku bansa bukai nya diguna ngambika sida nadai napi sebarang penanggul bejaku enggau bansa bukai.
“Pengelandik bejaku lebih ari semacham leka jaku meri pengelebih ngagai Malaysia lebih agi ba komunikasyen enggau menua bukai kelimpah ari pengawa dagang.
“Berengkah ari diatu kitai patut nempa raban nembiak ti ulih besemekih ba renggat dunya sereta nemu mai diri ngiring pemansang dunya,” ku iya.
Iya mansutka jaku nya ba Pengerami Makai Lemai alumni SMK Tun Abang Haji Openg ditu, malam ensanus.
Ku iya ke mega Menteri Pengawa Berumah, ekonomi menua diatu bepanggai ba gaya ekonomi menua besai baka menua China enggau Europah ti ngemeratka leka jaku diri.
Ngenang sentang pengerami malam nya, Abang Johari pechaya gempuru nya meri awak ngagai ex-pengajar enggau kepala pengajar betemu baru kelimpah ari ngerapitka kaul.
“Sekula tu (SMK Tun Abang Haji Openg) majak mansang ninting taun lalu udah mujur ngangkatka kualiti pelajar.
“Suba sekula tu tebal agi dikelala endur ngempuru raban nembiak manchal tang diatu sekula udah mujur nempa raban nembiak ke pintar,’ku iya.
Ba pengerami nya, Abang Johari bisi nyuaka geran RM30,000 ngagai Gerempung Apai Indai enggau Pengajar (PIBG) SMK TAHO ngambika tau dikena ngatur program, ti diterima Chairman protem alumni SMK Taho Ahmad Abang.