KUCHING: Asil tinjau seraya ke meresa rega minyak nitihka ubah baru ba semua stesyen minyak di serata menua Sarawak, Opis Pengawa Dagang Dalam Menua, Gerempung Kerejasama enggau Pekara Bebeli Barang (KPDNKK) mujur tetemuka sebengkah stesyen minyak Petronas di Bintulu udah ngelanggar atur.
Penyalah nya digaga nitihka perkara 21 (1) ngelanggar atur lisin (enda mujur netapka bekal barang seruran bisi sereta chukup), ku Ketuai Pemesai Opis Bekuasa Nengeri Sarawak Opis Pengawa Dagang Dalam Menua, Gerempung Kerejasama enggau Pekara Bebeli Barang (KPDNKK) Sarawak, Abd Hafidz A Rahim.
Iya madahka berindik ari sebuah stesyen nya ditemu ngelanggar atur nya ngujungka stesyen nya deka diukum laban ambis minyak kira pukul 3 lemai kemari.
“Kami deka mansik pekara tu lalu enti iya nyengala salah, kami deka mai kes tu ngagai kot,” ku Abd Hafidz madah nengah nengah pesan jaku pandak (SMS) ditu, kemari.
Ukum ungkup e penyalah bansa tu iya nya RM1 juta tauka jil tiga taun.
Kena 31 Jan tu tadi, Menteri KPDNKK Datuk Seri Hasan Malek bisi madahka rega minyak turun baru ungkup bulan Februari 2015.
Berindik ari penurun rega minyak, pemesai KPDNKK bisi meresa semua stesyen minyak di serata menua belabuh pukul 5 lemai kena 31Jan tu tadi.
Di Sarawak, KPDNKK ngaga dua buah operasyen di serata menua enggau pampang opis , iya nya ngaga Ops Catut (Siang) sereta peresa atur rega (runchit) petroleum malam hari Enam nyentuk hari Minggu.
Tuju pengawa tu laban rega baru minyak diesel enggau petrol udah diubah perintah belabuh pukul 12.01 tengah malam kena 1 Feb 2015.
Ari peresa stesyen minyak di serata menua Sarawak bekait enggau rega petrol/diesel nurun mungkur 99 buah Shell, 38 ‘Unbranded Mini-station’ (UMS), 85 buah Petronas enggau 12 buah Excel.
Di Kuching, pengawa mesera tu mungkur 42 buah Petronas, 50 buah Shell, 5 buah Excel ti belabuh diperesa ari pukul 12 tengahari kemari.