FORUM diperansang chakah sereta begempung ngatur pengawa

0

MIRI : Semua kaban komiti Gerempung Indu Bansa Orang Ulu Malaysia (FORUM) diperansang chakah bejalaika aktiviti ke tau meri penguntung ngagai gerempung enggau komuniti nya.

Kaban Kunsil Nengeri (ADUN) Telang Usan, Dennis Ngau minta semua kaban komiti FORUM seruran begempung dalam semua pengawa sereta nyukung pangan diri dalam sebarang aktiviti ke diatur ari baruh perabung ke sama.

“Pekara ke baka tu chukup beguna kena ngedut kaul enggau pangan diri dalam gerempung tu ngambika mayuh mayuh agi pemujur ulih diasai genap iku kaban komiti nya.

“Nya alai, aku ngarapka semua kaban FORUM seruran ngemeranka pemanah kaul enggau pangan diri sereta meri sukung ke enda betatak ngagai kaban komiti gerempung ke bukai enda ngira bansa pengawa ke diatur,” ku iya.

Dennis mansutka jaku nya lebuh ngulu pengerami Makai Lemai Taun Baru FORUM 2015 ke diatur ba sebengkah hotel tebilang ditu kena Hari Lima minggu nyin tadi.

Sama bisi datai ngulu pengerami nya, Sekretari Politik Kepala Menteri Kijan Toynbee, Residen Miri Kahti Galis, Presiden FORUM Gerawat Gala, Bini Dennis, Debbie Irang sereta Chairman Gerempung Bansa Kelabit Rurum, Datu Isaac Lugun.

Dalam jaku lalau iya, Dennis minta kaban gerempung FORUM meri tumpu ngagai tiga bengkah pekara ke tau nulung sida nyapai pemujur dalam sebarang pengawa ke dikereja iya nya, ruang bilik, pengarap, sereta raban indai.

Kelimpah ari nya, iya mega ngelalau raban bansa Orang Ulu ngambika enda leju meri sukung ngagai perintah laban mayuh projek pemansang ulih diasai enti sida majak bekempit enggau perintah.

“Mayuh projek pemansang udah dipedua ngagai rayat menua pesisir, nya alai aku ngelalau semua kitai ngambika nyukung Kepala Menteri (KM) enggau enda belampung ati laban pengelantang ke diasaika kitai nengah mayuh projek pemansang kemaya hari tu nya datai ari pengibuh KM,” ku iya.

Beserimbai enggau pengerami nya, Dennis bisi nyuaka bantu perintah RM10,000 ngagai kaban komiti gerempung nya sereta RM50,000 diberi ngagai FORUM.