Karim merambu numbuhka Sukarela Bomba di Asajaya

0

KUCHING: Dua belas iku ari ruang bilik ke dituntung penusah angus urung pukul 11.20 pagi kemari di genturung pendiau Sambir nerima bantu ari Kaban Kunsil Nengeri sitak nya (Asajaya) Datuk Abdul Karim Rahman Hamzah ke betemu enggau sida ke kena penusah nya.

Abdul Karim ti mega Menteri Muda Pemansang Nembiak (Nengeri) kelimpah ari nyuaka bantu belanja ari iya empu, bisi mega meri bantu pemakai sereta barang bukai ari Opis Pelilih Menua Asajaya enggau ari raban exco PBB Asajaya.

Karim madah, bisi pemerat numbuhka Bomba Sukarela di sitak menua nya, kena napi sebarang penanggul rumah angus ngambika ulih dibantu tekala nya.

“Muka sebuah palan Bomba di Asajaya, perambu nya udah dianjung ngagai opis besai Bomba tang opis Bomba bisi atur sida iya empu lalu beratika ni naka pemayuh orang ke diau ditu enggau infrastruktur, lalu naka ke diatu, aku udah dipadah bedau bisi pemutus deka muka palan Bomba nya.

“Taja pia, aku ngarapka ‘sukarelawan bomba’ ulih ditumbuhka sereta dibantu sida Bomba, alai komuniti ke diau ditu nengah JKKK ulih ngambi kos sereta diberi perengkaguna dikena madamka api,” ku iya.

Iya madah, opis menteri nya deka mantu sida ke kena tasah nya, ngaga rumah baru lalu ulih alai diau sebedau Hari Raya taun tu.

Sama bisi meri bantu ngagai ruang bilik ke kena tasah nya, Kelab Pengelantang Pendiau Opis Kaunsil Pelilih Menua Samarahan enggau ejensi bukai.