KUCHING: Barisan Nasional nengeri tu dipinta nganjung lis projek ke tepagang ti bedau dipejalai ngambika diserenih sereta dikemerat ba renggat BN pusat.
Sapit Menteri Besai ti mega Sapit Chairman BN, Datuk Patinggi Tan Sri Muhyiddin Yassin madah, nya dikena nentuka semua projek ti deka dipejalai ke udah disemayaka dalam pengawa bepilih besai (PRU) enggau pengawa bepilih nengeri (PRN) sebedau tu, mujur dikenukuka magang.
Ku iya, pengari rayat minta semua projek pemansang ti udah disemayaka nya jampat dipejalaika.
“Kami minta semua pengari rayat (ADUN) BN nganjung lis projek betangguh ti bedau dipejalaika ngagai sekretariat BN Sarawak udah nya dianjung ngagai BN pusat.
“Ari nya kami deka ngenukuka enggau opis menteri ti bekaul kemaya projek nya deka dipejalaika. Jampat agi dipejalaika manah agi.
“Ditu aku deka madah, semua ti udah komited secara rasmi ungkup Sarawak endang deka dipejalaika, nya komitmen perintah BN, aku mega arap bendar perintah BN nengeri ngembuan komitmen ti sama,” ku iya.
Iya ke mega Menteri Pelajar mansutka pekara nya dalam aum pengarang berita ba sebengkah hotel ditu kemari, dulu ari nya iya betemu enggau Kepala Menteri ti mega Chairman BN Nengeri sereta Presiden Parti Bumiputera Bersatu (PBB) Datuk Patinggi Tan Sri Adenan Satem sereta raban presiden parti komponen BN Sarawak.
Taja pia ku iya, deka ngemujurka projek nya begunaka timpuh sereta dipejalaika bererenggat kelimpah ari betapi enggau mayuh penanggul ari kunteriktor.
“Tang proses bejalaika pekara tauka projek pemansang tu nyengkaum bekal elekterik enggau bekal ai beresi menua pesisir, sekula sereta jalai enggau ke bukai begunaka timpuh.
“Taja pia kami terus komited deka nentuka projek nya dipejalaika, tang kitai tentu ulih meretika kekadang penangguh projek tu ketegal penanggul teknikal ti bekaul enggau penyulut kunteriktor,” ku iya seraya madahka pekara nya mega deka diperati sereta diputarka.
Nambahka nya dalam aum pengarang berita ke sama, Muhyiddin madah, entara pekara ti diaum mega nyengkaum bajet ti dikurangka.
Pemutus Menteri Besai ngurangka bajet nya berindik ari mayuh pekara nyengkaum rega minyak ti udah nurun enggau ke bukai, ku iya.
Kelimpah ari nya Muhyiddin mega muji sereta temegah ati ngagai iring Datuk Patinggi Tan Sri Adenan Satem sepemanjai iya ke nyadi Kepala Menteri.
Iya madah, Adenan amat bebendar bejalaika polisi ti dikemeran enggau dikemeratka nyengkaum nagang penyalah makai suap, ngambi kayu belalai enggau ke bukai.
“Aku meri pengaga ati ngagai YAB Kepala Menteri sepemanjai timpuh iya ngiring Sarawak, sukung ari rayat endang amat manah.
“Polisi ti dibantai sereta dikemeranka iya lebih agi bekaul enggau isu besai nyengkaum ngemunaska penyalah makai suap, ngambi kayu belalai endang nerima sukung ti manah, lalu aku ngarapka trend tu terus nyentuk maya pengawa bepilih nengeri ila,” ku iya.
Bela bisi dalam aum pengarang berita kemari, Sekretari Besai BN Pusat Datuk Seri Tengku Adnan Tengku Mansor, Sapit Kepala Menteri Datuk Patinggi Tan Sri Alfred Jabu Numpang, Presiden Parti Rakyat Sarawak ti mega Menteri Pemansang Tanah Tan Sri Datuk Amar James Jemut Masing, Presiden Parti Rakyat Bersatu Sarawak Senator Datuk Prof.
Dr. Sim Kui Hian, Presiden Parti Demokratik Progresif Sarawak Datuk Seri Tiong King Sing enggau kebukai.