SIBU: Bala nembiak Tadika Yakin Diri YMCA chukup berasai gaga pengudah nerima ‘ang pau’ nyerumba pengerami Taun Baru China (TBC), empai lama ke udah.
‘Ang pau’ nya disuaka Chairman Kuansil Direktor Tadika Yakin Diri YMCA Temenggong Vincent Lau Lee Ming, Sapit Chairman Kapitan Datuk Janet Lau, Sekretari Simon Tiong, kaban kaunsil Richard Wong Ei Sing, Chairman Dipebasa YMCA Unit Indu Catherine Wong sereta Kepala Pengajar, Teresa Lau.
Lebuh bejaku ba pengerami nya, Vincent Lau madah endang beguana amat semua nembiak tadika ngasaika pangaga ati beserimbai enggau pengerami Taun Baru China taja pan tebal agi nembiak ke belajar dia ukai bebansa China.
“Taun Baru China endang sebagi ari pengerami besai ke diintu ba Malaysia sebaka enggau pengerami bukai baka Hari Gawai, Hari Raya enggau Deepavali. Kitai rayat Malaysia chukup berasai betuah laban ulih ngintu semua pengerami begulai enggau pangan diri,” ku iya.
Berebak enggau nya, iya mega nyadaka langgur penemu ngasuh piak tadika ngintu pengerami bukai baka Hari Raya enggau Gawai, kelimpah ngintu Taun Baru China.
Ngenang sentang ang pau ke diberi nya, Vincent Lau madah, nya endang udah nyadi adat bansa China dikena meri selamat taun baru china ngagai orang ke nerima.
“Nengah pengawa meri ang pau tu ngagai nembiak, kitai ngarapka sida seruran bepengerai sereta seruran lantang,” ku iya.