Udah dua minggu ngenduh dia nadai seling pasal penunga kuing peranak 17 ruang bilik nya naka diatu
Dikarang Chris Bishop //
KUCHING: Kenyau 1 Februari 2015, 44 iku peranak ari 17 ruang bilik di Rumah (Rh) Anyi, Mapuh Baruh, Spak Betong mengkang ngenduh ba palan pengenduh tasah ngenyit di Dewan Rentap, ditu.
Sekayu rumah panjai nya dipindah pengudah tanah ba puting rumah panjai sida balat tusur ketegal ujan ti enda ngetu dalam timpuh dua minggu ke udah iya nya rambau bah ke nuntung pelilih Betong bedau lama tu tadi.
Nyentuk ke diatu, nasit sida serumah tu bedau ditemu ke alai perintah pan bedau nyendiaka sebarang bantu ke alai pemutus mulaika diri ngagai rumah panjai ukai sebengkah penemu ke menyana berindik ari tanah ke tusur nya mengkang baka selama.
“Sehari tu manggai timpuh dua minggu peranak Rumah Anyi, Mapuh Baruh ngenduh di Dewan Rentap ke alai sida diberi makai dua kali sehari, iya nya makai tengahari enggau lemai ke disedia JPAM enggau Opis Pengintu Pengelantang Pendiau (JKM).
“Gerempung Bansa China Betong udah dua kali meri bantu pemakai ngagai sida ditu dalam timpuh dua minggu ke udah,” ku Ketuai Penerang Parti Keadilan Rakyat (PKR) Sarawak Vernon Kedit maya penemuai iya ngabas sida di Dewan Rentap kena Hari Enam tu tadi.
Taja pan diberi palan endur ngenduh sereta sekeda pemakai, sida ke tasah madahka nasit diri mengkang baka hari keterubah mindah suba lalu enda ditemu kini penunga udah tu, tandu Vernon.
Ku Vernon, naka ke diatu sida enda nerima sesen bantu ari perintah ketegal dituntung penusah ngenyit taja pan udah nyain sekeda form ke diberi JKM.
“Naka diatu, perintah nadai meri sebarang bantu ngagai sida tu baik nya ba pekara nyendia geran rumah tauka lun berumah. Enda mega perintah madah sekalika deka mantu sida ngiga palan endur berumah ke baru,” ku Vernon.
“Udah dua minggu penusah nya nyadi, balat ngenyit ke ati kitai, ejensi ke megai tanggungpengawa pan enda kiruhka penusah tanah tusur di Betong, nadai sebarang bantu enggau sukung ke nyengala udah diberi,” ku iya nambah.
Ngenang kaul ke sama, Vernon ke mega Chairman PKR Betong netapka semua sida ke dituntung penusah ngenyit di menua tu seruran nerima bantu ari Perintah Malaysia lalu nama kebuah rayat seranta ari pelilih Betong enda dikeibuh.
“Sapit Menteri Besai udah madah, perintah deka meri bantu ngagai semua ke dituntung penusah bah di Sarawak tang nama kebuah peranak Mapuh Baruh enda dipasuk dalam rintai orang ke nerima bantu?.
“Sida tu mengkang nganti, mingu beganti minggu…sapa deka mantu sida lalu berapa lama sida deka diau nguan Dewan Rentap?,” tanya Vernon.
Di Dewan Rentap sida bisi nyendiaka ‘Tabung Bencana’ diri empu ngambika tau nyaup sekeda belanja ninting hari sida di palan nya.
“Balat ngasuh ati sinu, sida nyendiaka tabung bencana ke digaga ari tin biskut ti diengkah ba pintu penama dewan.
“Pekara tu enda patut nyadi di pelilih menua ke udah mansang baka Betong,” ku Vernon.