KUCHING: ‘Camera, Lights, Action!’ Kuching sekali agi diberi basa nyadi tuai rumah ngatur AIFFA 2015 ti deka berengkah kena 9-11 April 2015, ‘ASEAN International Film Festival Awards’ (AIFFA) 2015 lalu legit pengerami malam penudi iya nya ‘AIFFA Gala Dinner’ ke deka diatur di Palan Aum Besai Borneo Kuching (BCCK) ke bisi ngangauka mayuh bintang filem antarabansa ASEAN, kena 11 April 2015.
Menteri Dagang Temuai Datuk Amar Abang Johari Tun Openg madah, ba bulan Januari taun 2014, Sarawak udah nyadi tuai rumah ngatur konferens Menteri Dagang Temuai ASEAN, lalu dalam konferens nya, menteri ASEAN netapka AIFFA sebengkah pengawa ke strategik ke patut diatur di Malaysia.
Abang Johari madah, enggau sukung Menteri Perintah Besai dalam pekara Dagang Temuai enggau Adat Pesaka, Malaysia meri perambu Kuching diberi basa nyadi palan endur AIFFA 2015, tiap dua taun sekali.
“Enggau kelai nya ari Menteri Dagang Temuai ASEAN ari 10 bengkah menua, Kuching diatu nyadi palan pengerami nya tiap dua taun sekali,” ku Abang Johari.
AIFFA sebedau tu kala diatur di Kuching dalam taun 2013, lalu enggau pemujur nya, menteri ASEAN ngasaika Sarawak bisi peneleba ngatur AIFFA 2015, ke nyadi atur pengawa ASEAN ke udah ditetapka di Kuching tiap dua taun sekali.
“Aku meri terima kasih ngagai menteri Dagang Temuai ASEAN laban udah milih Kuching. Taun 2015 enti nitih, Malaysia nyadi chairman menua ASEAN, lalu tentu atur pengawa baka tu deka nyerakup sereta ngaul begulai pengerindu pengawa rama mensia ari 10 buah menua ASEAN,” ku iya.
Iya madah munyi tu ba aum media pengudah bejadika ‘Soft Launch ASEAN International Film Festival & Awards 2015’ ba sebengkah hotel ditu apin lama ke udah.
“Dijangka AIFFA sekali tu manah agi ari AIFFA 2013 laban kitai (Sarawak) udah bisi peneleba ngatur pengawa besai baka tu, lalu taun tu, kitai beratika 150 raban tukang ngaga filem deka datai maya AIFFA 2015, nyengkaum 200 selebriti ari menua ASEAN ke deka begempuru di Kuching,” ku iya.
Entara selebriti sereta pengeluar filem antarabansa ti deka datai ke Kuching tu ila, nyengkaum Raymond Gutieraz (ari The Philippines) enggau Christine Hakim ari Indonesia sereta sekeda artis bukai. Baka taun 2013 nyin tadi, AIFFA 2013 bisi ngangau bintang filem tebilang ari the Philippines, Jericho Rosales.
Baka Cambodia ku Abang Johari, tu keterubah sida nganjung pekit filem ngagai AIFFA 2015.
Kelimpah ari nya, pekara bukai ke bisi nyadi dalam 2015, nyain dua MoU filem digaga bekaul enggau Sarawak, iya nya Kilat (ungkus ngaga filem tu RM6 juta lalu 30% deka diberi ngagai nengeri tu laban iya digaga di Sarawak), cherita Sapok Biki digaga nyadi dokumentari filem ari Moon Beam Production, enggau Bujang Senang ti digaga Hollywood enggau ungkus RM12 juta lalu 60 peratus ari filem nya digaga di Sarawak.
Iya nandu baru, sebuah filem sejarah, ‘White Rajah’ diatu benung diperundingka deka digaga di Sarawak bekerejasama enggau Hollywood film, ke benung dipejuraika seiku orang dagang Sarawak tebilang Tan Sri Effendie Norwawi.
“Kaul baka tu deka ngenudukka pengawa ngaga filem sereta ngangkatka siti-siti endur nya kelimpah ari meri peluang ngaga bala nembiak menua tu. Sarawak bisi nembiak ke mayuh pengelandik. Peda aja ‘Ms World Universe’ ke bisi pengelandik ari Sarawak,” ku iya.
Ari AIFFA 2015, Abang Johari madah, Sarawak deka bulih publisiti serata dunya ke dijangka berega RM1 juta.
Maya atur pengawa AIFFA 2015 nya ila, mensia mayuh ke deka enggau pengawa makai lemai kena 11 April, tau meli tiket ngagai ‘Gala Dinner’ nya nengah ‘ticket charge online’ ke deka dibuka enda lama agi.
Rega tiket maya makai lemai ‘Gala Dinner AIFFA 2015’ berega RM500 seiku (dalam dewan ke bisi makai lemai), di luar dewan RM50 seiku (nadai makai lemai), lalu sebedau nya, mensia mayuh ke deka meda ‘Movies in the Rainforest’ ti deka digaga di Sarawak Cultural Village (SCV) deka ngechaj RM30 seiku.
Sama bisi ngulu atur pengawa nya, Menteri Muda ba Opis Kepala Menteri (Pemansang Orang Dagang Bumiputera) Datuk Naroden Majais, Menteri Muda Dagang Temuai Datuk Gramong Juna, Ketuai Pemesai Eksekutif AZAM Datu Aloysius Dris, enggau chairman BCCK empu, Tan Sri Leo Michael Toyad.