Kes dadah di Sarawak pemadu mimit di Malaysia

0

Dikarang Jacqueline David//

 

KUCHING: Ulah salah guna dadah di Sarawak entara ke pengabis mimit dibanding enggau menua bukai di Malaysia.

Kepala Opis Narkotik, Polis Diraja Malaysia (PDRM) Supt Lukas Aket madah, Sarawak entara menua ke pengabis mimit betapi enggau penanggul makai dadah, iya nya ba tangga lumur tiga ari baruh di Malaysia.

Di Malaysia ku iya, menua ke pengabis mayuh, iya nya Selangor, Pulau Pinang enggau Johor.

“Sarawak ba tangga lumur tiga pengabis baruh dibanding enggau menua bukai di semenanjung. Enti nitih statistik sida ke ditangkap ketegal kes dadah dalam taun 2014, urung 5,237 iku ke lalu dirintai ari baruh bekal, ngempu sereta peresa ai kemi.

“Tang enti dibanding enggau pemayuh dalam taun 2013, penyampau ke ditangkap manggai 4,248 iku. Enti diperatika taun 2013 enggau 2014, taun 2014 bisi nambah,” ku Lukas seraya madahka bengkah dadah ke seruran dikena, iya nya bepanggai ba trend dadah maya nya tang diatu mayuh ke makai ‘Designer’s Drug’ (DD) baka Syabu, Ecstasy, Eramin 5 sereta sekeda bansa DD bukai.

Ari statistik ejensi Anti-Dadah Kebangsaan (AADK), Direktor opis nya, Wan Madehi madahka ti dijaga AADK diatu bisi 614 iti kes baruh Seksyen 61 (B) enggau 38 (B), lalu ari pemayuh nya, 175 iti kes dijaga di CCRC Kuching, 227 iti kes baruh Seksyen Dikemata lalu laluh nya, 122 iti kes asil ditangkap polis Narkotik baruh Seksyen 28(B).

Sebedau nya, ba atur pengawa Aum Khas Komiti Pengatur PEMADAM Menua Sarawak beserimbai enggau ‘Jasamu Dikenang ke ex-chairman PEMADAM Menua Sarawak, Datuk Hajah Sharifah Mordiah Tuanku Fauzi’ bela digulu Menteri Muda Pemansang Nembiak (Nengeri) Datuk Abdul Karim Rahman Hamzah, ti dipilih nyadi Chairman PEMADAM Nengeri Sarawak nganti endur Sharifah Mordiah ke udah 28 taun lebih mangku pengawa nya, ba sebengkah atur pengawa ti digaga di sebuah hotel ditu, kemari.

Abdul Karim ti dituduh mangku pengawa nyadi chairman PEMADAM Menua Sarawak dipilih Kepala Menteri empu, Datuk Patinggi Tan Sri Adenan Satem, ti mega nyadi Penyanding Penemu PEMADAM.

“Aku meri besai terima kasih ngagai Datuk Sharifah Mordiah Tuanku Fauzi lebih udah gawa enggau gerempung tu dalam siti timpuh ke panjai.

“Pengawa PEMADAM sigi berat laban megi tanggung pengawa ke berat, iya nya nagang, meri penemu ngagai mensia mayuh bekaul enggau pengawa makai dadah tu tau nganu kitai empu sereta komiti PEMADAM renggat Menua nyengkaum ejensi Perintah bukai baka Agensi Anti-Dadah Kebangsaan (AADK), Opis Narkotik ari PDRM nyengkaum opis Pelilih Menua di serata menua Sarawak,” ku Abdul Karim.

Setipak enggau tuju sereta singkang PEMADAM, sida iya bisi perambu ti deka digaga tauka benung digaga dalam timpuh lima taun tu, iya nya meri penemu sereta ngaga aktiviti di sekula-sekula kelimpah ari aktiviti nembiak di serata menua Srawak.

“Kami mega beratika endur ke tebal agi pengawa salah makai dadah tu suah agi nyadi, lalu deka meri fokus kami ngagai endur nya, ngambika penanggul makai dadah tu ulih dikurangka.

“Kelimpah ari meri penemu ngagai sekula, kami mega betatika meri penemu pasal pekara tu ngagai Palan Pelajar Tinggi Perintah (IPTA), Palan Pelajar Tinggi Peribit (IPTS) tang ke berat agi ngagai apai indai,” ku iya.

Abdul Karim dalam jaku iya madah, tanggungpengawa PEMADAM berat ke lebih agi dalam pengawa meri penemu pasal penanggul makai dadah, dalam pengawa ngangkatka menua tu nadai agi betapi enggau dadah manggai taun 2020 ila.

“Pemansang Pelilih Menua ukai semina ngaga perengka guna aja, tang pengawa opis Pelilih Menua mungkur pemansang ‘spiritual’ ke lebih agi ba rebak baru, nembiak laban ngelingi sida iya, mayuh nembiak betapi enggau pengawa salah makai dadah.

“Nya alai, enti penanggul bansa tu enda dikemutarka, manah bakani pan pemansang perengkaguna digaga, nadai reti sekali.

“Aku beratika ngemunas sereta nagang pengawa salah makai dadah tu siti tanggungpengawa mai rebak baru pansut ari jalai nya, lalu mulaika diri nyadi orang ke menyana. Dalih ku jaku, nadai hari tauka gagau enggau pengawa enda patut digaga nyadi dalih bala raban pegawai Pelilih Menua ke nyadi chairman PEMADAM Pelilih Menua enda ngereja pengawa sida iya nyadi chairman,” ku iya, lalu ngelalau pemesai Pelilih Menua tu tau minta bantu ari AADK, polis, Opis Pelajar, Opis Pengerai sereta NGO bukai.

Iya nandu baru, ejensi Opis Kandang menua (PBT) bansa nya enggau NGO baka PEMADAM ke nyadi palan meri servis, raban PEMADAM bisi hari ngaga aktiviti nagang penanggul makai dadah, ku iya.

“Nyadi chairman PEMADAM di renggat Pelilih Menua, pegawai-pegawai pelilih menua patut nemu ni naka pemayuh bala nembiak di sitak kita betapi enggau penanggul makai dadah, ni bagi sitak ke seruran digagai sida iya, sereta ngelala nembiak ke bisi peluang muntang betapi enggau dadah,” ku iya.

Iya madah PEMADAM Sarawak deka terus nyadi pemerat beratika semua 31 pampang pelilih menua sereta raban sida iya, orang ke ngatika diri di serata menua tu enggau objektif sida iya, ukai semina mantaika pemerat nagang tang meri kelala palan baru nagang ba seiku-seiku enggau renggat komuniti.

Baruh Perambu Strategik PEMADAM Sarawak 2015-2020 ku iya, naka Disember 2014, urung 770 program ‘Outreach’ enggau aktiviti bisi digaga lalu ari pemayuh nya, 220 aktiviti enggau program digaga di nengeri sereta nembiak menua pesisir.

“Baruh Perambu ke Patut Digaga 2015-2020, PEMADAM menua tu udah merambu urung 156 program ke deka mai sereta urung 558,000 penyereta di serata menua.

“PRIHATIN mai reti P-Prevention (Nagang), R-Rehabilitation (Ngeraika), I-Integration (Kesepaduan), H-Human Touch (sentuhan manusia), A-Affiliation (Kesejawatan), T-Thoughtful (Berbudi), I-Independent (Ngatika Diri) enggau N-Natural (Jatidiri),” ku iya.