Dikarang Rengenyan Labang //
JTS patut ngiga chara sereta alternatif bukai dikena ngemuntang atur ngungkupka pala tanah
JAGA MANAH: Tengah (tiga kiba) nyuaka Surat Pala Tanah Kampung Tradisi ngagai seiku ari 81 pengempu tanah, seraya iya ngelalau ngambika nyaga sereta enda nyual tanah nya, ti diperatika (ari kiba) Penguasa Tanah dan Survei Bahagian Samarahan Rozlan Putit, Direktor JTS Sejeli Kipli sereta ke bukai.
ASAJAYA: Opis Tanah enggau Survei (JTS) dipinta ngiga mekanisma ti senipak kena nukar terus Lesen Pendudukan Sementara (TOL) nyadi pala tanah.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hasan madah, pekara nya mega udah dikerandau sereta dipesetujuka Kepala Menteri Datuk Patinggi Tan Sri Adenan Satem.
“Kami udah minta JTS ngiga mekanisma ti senipak ngambika kitai ulih nukar terus TOL nyadi pala tanah.
“Taja pia, nyangka bisi sekeda orang milih TOL laban deka ngaga rumah kediri, enti terus ditukar nyadi surat pala tanah engka bisi sekeda enda ulih mayar premium tekala nya, nya alai aku udah minta JTS ngiga mekanisma enggau alternatif ngambika TOL ulih ditukar terus nyadi pala tanah,” ku iya.
Menteri Perengka Guna Mensia Mayuh nya mansutka pekara nya lebuh bejaku ba pengerami nyuaka ‘Surat Hakmilik Tanah Kampung Tradisi & Lesen Pendudukan Sementara (TOL)’ bagi menua tu ti diatur JTS ba Kompleks Sukan Asajaya ditu, kemari.
Ba pengawa nya, Awang nyuaka 81 iti surat pala tanah Seksyen 18 KTN asil ari ‘Program Penyukatan Kampung Tradisi’, ngagai pengempu tanah Kampung Tradisi Sambir (35 surat pala tanah) enggau Kampung Tradisi Bangka Semong (45 surat pala tanah) di bagi menua Asajaya.
Ba pengerami ke sama iya mega nyuaka 191 TOL ti mungkur lima (5) ‘Skim Pembesaran Kampung’ di Bagi Menua Asajaya iya nya ‘Skim Pembesaran Kampung Tambirat’ (2 TOL); ‘Skim Pembesaran Kampung’ Asajaya Masjid (38 TOL); ‘Skim Pembesaran Kampung’ Asajaya Ulu (30 TOL); ‘Skim Pembesaran Kampung Mang’ (37 TOL) enggau ‘Skim Pembesaran Kampung Sebandi Matang/Ulu’ (84 TOL).
Ngenang surat pala tanah Kampung Tradisi nengah Seksyen 18 enggau TOL nya, Awang Tengah madah, perintah deka terus bejalaika Program Pengukuran Kampung Tradisional ke lalu diberi pala tanah dikena nentu tanah ti lama udah diuan peranak Kampung terus diempu sida.
Pengempu surat pala tanah di baruh Seksyen 18 KTN ti dikeluarka ungkup Kampung Tradisional, sida nadai dipinta mayar pengawa nyukat, premium enggau chukai tanah ninting taun sereta pala tanah nya mega terus diempu pengempu tanah nya.
“Di Samarahan nyengkaum Asajaya kami udah ngemendarka pengawa nyukat nengah Program Penyukatan Tanah Tradisi sepenyampau 49 buah Kampung Tradisi,
“Kami udah nyukat sepenyampau 7,578 lot lalu ari penyampau bisi 6,616 alai ngaga rumah endur diau nyengkaum ke disuaka seharitu enggau kandang menua bukai. Lalu 1,000 lebih agi deka diberi bererenggat.
“Skim Pembesaran Kampung ditumbuhka dikena meri peluang peranak Kampung ngambika diau lantang enggau likun sereta ngasaika perengka guna mensia mayuh jalai, ai enggau elektrik,” ku iya.
Berebak enggau tu Menteri Pemansang Industri nya mega ngelalau pengempu surat pala tanah nya ngambika nyaga surat pala tanah nya enggau manah.
“Surat pala tanah tu patut dijaga enggau manah laban tu ulih ditampung rebak dudi, anang nyual tanah tu laban tu aset ti pemadu berega,” ku iya.
Bisi datai ngagai pengawa nya kemari, Menteri Muda Pengatur Pemansang Pengeraja Asal Datuk Naroden Majais, Menteri Muda Pengawa Berumah ti mega Kaban Kunsil Nengeri (ADUN) Asajaya Datuk Abdul Karim Rahman Hamzah enggau ke bukai.