Dikarang Rengenyan Labang//
Pemutus KM nya endang engkeman amat, diterima semua bansa Dayak enggau chukup pengaga
KUCHING: Pemutus Kepala Menteri Datuk Patinggi Tan Sri Adenan Satem ti setuju enggau perambu iya nya istilah ‘lain-lain’ diganti enggau ‘Dayak’ endang pemutus ti engkeman sereta manah.
Menteri Muda Pengerai Mensia Mayuh Datuk Dr. Jerip Susil madahka pemutus nya senipak enggau pemaik enggau pengelantang nengeri Sarawak.
“Nya senipak amat enggau gaya pemaik enggau pengelantang kitai di nengeri Sarawak.
“Dayak amat sinonim enggau bansa Bumiputera ukai Melayu di Sarawak,” ku Kaban Kunsil Nengeri (ADUN) Bengoh nya lebuh dipinta meri penerang bekaul enggau pemutus kepala menteri ti besetuju enggau perambu ngena leka jaku ‘Dayak’ nganti ‘lain-lain’.
Nambahka nya, Presiden Sarawak Dayak Graduate Association (SDGA) Dr. Dusit Jaul mega madahka diri setuju enggau pemutus Kepala Menteri Datuk Patinggi Tan Sri Adenan Satem.
Dusit madahka Kepala Menteri udah mendingka penemu semua bansa Dayak ke lebih agi dekaka leka jaku ‘Dayak’ dikena nganti ‘lain-lain’ dalam semua pom perintah.
Iya madah, Dayak tu endang identiti kenyau ari kelia sereta patut ditanka.
“Pemutus Kepala Menteri ti setuju nganti leka jaku ‘lain-lain’ ngena ‘Dayak’ endang pemutus ti engkeman sereta betul.
“Reti iya Kepala Menteri udah mendingka penemu semua bansa Dayak ke deka meda ‘lain-lain’ diganti ngena ‘Dayak’.
“Dayak tu identiti kitai kenyau ari kelia apin menua ke dikumbai Malaysia ditumbuhka ba taun 1963. Patut iya, pekara tu enda ibuh dikelikuhka kitai agi,” ku iya seraya madah Kepala Menteri udah setuju, semua Dayak pan setuju.
Kelimpah ari nya, Menteri Muda Perengka Guna Mensia Mayuh Datuk Dr. Stephen Rundi madahka, nya endang penemu ti dikedeka kitai.
Taja pia ku iya pekara nya deka dipejuraika raban komiti ti diperambu deka ditumbuhka.
“Nya kedeka kami lalu pekara nya deka dipejuraika ila,” ku iya.
Lebuh dalam program wawancara ‘Bersama Ketua Menteri Sarawak’ malam ensanus nengah inisiatif Seksyen TV RTM Kuching, Kepala Menteri Datuk Patinggi Tan Sri Adenan Satem madahka diri setuju enggau perambu ngena istilah ‘Dayak’ dikena nganti ‘lain’lain’ nyema nya dikedeka ke semua piak.
Ku Adenan, sebedau tu iya kala meri perambu ngambika ‘lain-lain’ nya diganti enggau Bumiputera Iban, Bumiputera Bidayuh enggau Bumiputera Orang Ulu.
Adenan mega madah, sebengkah komiti khas pasal pekara nya deka ditumbuhka ti diarika Menteri Bekebun Bedandang Besai enggau Komoditi Datuk Amar Douglas Uggah Embas sereta Menteri ba Opis Menteri Besai Datuk Joseph Entulu Belaun.
“Taja pia bisi sekeda piak enda setuju enggau perambu nya sereta mengkang deka ngena leka jaku ‘Dayak’ aja.
“Ba aku nya bepanggai ba sida lalu aku nadai mantah pasal nya. Tambah mega ‘Dayak’ mungkur semua lalu aku setuju enti deka ngena ‘Dayak’,” ku Adenan dalam wawancara nya.