DIPERAMBU: Adenan maya berandau ba program ‘Bersama Ketua Menteri Sarawak’ sebengkah inisiatif Seksyen TV RTM Kuching sereta dipandangka terus nengah TV1 malam ensanus.
KUCHING: Perintah nengeri merambu deka ngetu tauka ngurangka penyampau bayar tol di Sarawak.
Kepala Menteri Datuk Patinggi Tan Sri Adenan Satem madahka, taja pia pekara nya agi diperundingka enggau kompeni konsesi sekalika perambu nya ulih dipejalaika.
“Pasal tol di nengeri tu kitai diatu benung berunding enggau kompeni ti bekaul ngambika bayar tol diturun tauka diketuka.
“Taja pia diatu pekara nya agi dalam renggat diperundingka,” ku iya.
Iya mansutka pekara nya maya program wawancara iya nya rancangan ‘Bersama Ketua Menteri Sarawak’ sebangkah inisiatif Seksyen TV RTM Kuching dikena ngelai tauka ngerami setaun iya dichirika nyadi kepala menteri.
Adenan madahka, Sarawak mega enda ngetuka polisi enggau atur imigresen dikena ngetan enggau nyaga pemaik enggau pengelantang pupu bansa di Sarawak.
Kebuah iya, polis ke udah bisi endang sebengkah ari syarat Sarawak sama enggau numbuhka Malaysia, ku iya.
“Nya alai kitai (Sarawak) bisi kuasa ngetan tauka nagang sida ari Sabah enggau Semenanjung Malaysia tama ke nengeri tu.
“Kebuah iya laban kitai enggaika Sarawak tekeruga enggau pekara negetif ari Semenanjung Malaysia. Sarawak ngempuruka etnik ari mayuh bansa baka Melayu, Cina, Iban, Bidayuh enggau Orang Ulu ti udah bebakih enggau pangan diri beratus taun ke udah,” ku iya.
Ngenang pasal penyakal, Adenan madahka, iya besedia mendiangka penemu ari penyakal enti meri penguntung tauka pemanah ngagai rayat.
“Sida mega peranak Malaysia sereta anak Sarawak nya alai nadai salah kitai mendingka (penemu)..engka kitai enda setuju tang kitai meri peluang mendingka nama utai ku sida.
“Ba aku baka nya mega sida sereta kitai enggau terus bemunsuh lalu sida ulih datai betemu enggau aku sebarang maya asal ukai pekara ti enda tentu,” ku iya.
Kelimpah ari nya pasal chara iya nyadi ketuai mujur narit ati raban bansa Cina di nengeri tu ngambika terus nyukung iya, Adenan madahka, tiga pekara patut dikemeratka ngagai raban bansa nya.
Keterubah, anang ngumbai bansa nya orang datai, kelimpah ari meri peluang nengah meri gelar ngagai sekolah persendiri aliran Cina di nengeri tu sereta meri peluang dagang ngagai sida.
Ku iya, raban bansa Cina amat ngemeratka pelajar, taja pan (pekara pelajar) dibaruh perintah besai tang perintah nengeri deka terus mantu sekula Cina.