JAMILAH
BISI orang nyebut maya ‘Aquarius’ betemu enggan ‘Leo’, kaul nya lekat nengah puji enggau pangan diri. Taja pan Kepala Menteri Datuk Patinggi Tan Sri Adenan Satem enggau Datin Patinggi Puan Sri Dato Jamilah Anu enda arapka ‘horoskop’, kaul entara seduai endang patut nyadi chunto ‘lebuh Aquarius betemu enggau Leo’.
Penyayau seduai ngagai pangan diri endang nyengala dipeda. Mua Adenan nyengala perenching tiap kali Jamilah ayan. Pia mega, lebuh seduai ngulu pengawa ke sama, mata Jamilah seruran beratika ‘lelaki tu’ ke udah beruang bilik enggau iya ngelama 35 taun.
Seduai melaki bini dipeda baka ke bisi ngembuan ulah ke enda sebaka – Adenan jenuh agi sereta imun lalu deka agi ngereja pengawa tang Jamilah bagas agi begulai enggau orang bukai sereta berani mansutka penemu. Ulah seduai ti enda sebaka nyukupka pengurang pangan, ti nulung seduai nempuh maya senang tauka tusah, maya hari panas tauka gelumbang besai.
Udah lebih tiga dekad jadi enggau lelaki ke serius nya, Jamilah nemu ari pun iya nyukung ukai reti patut bisi ba tisi Adenan belama. Jamilah nemu kemaya iya patut meri awak ngagai Adenan dikena iya beratika sekeda isu, taja pia Jamilah nentuka iya enda tinduk ngelama beberapa hari ngambika iya ulih ngemataka Adenan lebuh Adenan ke enda gerai nyamai.
Indah diatu pan, udah iya ke nyadi bini Kepala Menteri,agi nyumai sereta nyendiaka pemakai ke Adenan di dapur. Nya alai, iya enda tenyit ati lebuh Adenan lebih ari sekali mansutka jaku madahka pengerindu enggau penyayau ati iya ke Jamilah ke dikumbai iya ‘pekara pemadu manah ti kala nyadi ba aku’.
Udah setaun Adenan nyadi Kepala Menteri Sarawak, maya randau eksklusif, Jamilah bejaku pasal pengidup seduai melaki bini, pengerindu seduai ti amat besai ba pangan diri sereta pengawa seduai ke nyadi ketuai ‘Fairland Sarawak’.
T: Ulih kami nemu baka ni nuan enggau Kepala Menteri keterubah endar bekekala?
JA: Kami bekelala ba Opis Rela endur aku gawa nyadi sekretari. Nya kebuah iya suah nyebut iya endang beterima kasih ngagai Rela laban iya tetemuka aku dia.
T: Bakani nuan meda pendiau iya?
JA: Taja pan gamal iya baka ke serius, Datuk Patinggi seiku mensia ke nelap ati. Iya seiku ketuai ti mendingka rayat enggau silik. Iya bejalaika pengawa enggau serius laban iya nemu nama aspirasyen rayat sereta penusah sida ila. Ngagai tim politik enggau perintah iya, iya enda bechiping ati sereta enda bejaku belalai. Iya seiku mensia ke ulih ngereja mayuh bengkah pengawa, taja pia aku nemu iya seiku lelaki ke chakah gawa sereta enda bula ke jaku. Lebuh iya gawa, iya teulihka inspirasyen ari ‘litericha’ sereta amat ngemeratka etika pengawa ti manah. Nya kebuah iya arapka penemu ‘semua pengawa ti dikereja nuan, kereja enggau manah’.
Iya engka dipeda baka ke serius tang iya ukai mensia ti bedendam. Iya nadai ati jai baka nya dalam iya. Iya endang arapka orang ulih berubah lalu nyadi lebih manah. Ketegal semua kualiti tu, aku amat bebasa sereta muji iya.
Iya seiku mensia ti ngembuan kualiti ketuai ti nyulut tang lebuh iya di rumah, utai ti dikedeka iya mudah aja. Dalam ati iya, iya endang agi seiku nembiak ari menua pesisir sereta meruan ingatka asal penatai iya empu. Ba penemu aku, iya pemadu gaga ati lebuh iya begulai enggau orang ari menua pesisir sereta ketuai raban bansa.
T: Baka ni pendiau iya nyadi laki enggau apai?
JA: Di rumah, iya dekaka utai ti muntang. Lebuh bisi di rumah, iya rindu nyumai lauk asal Melayu ti mudah dipanduk. Iya nadai mayuh jaku. Iya serius tang seruran sayauka bala anak enggau bala uchu. Kekadang angin iya nemu berubah lalu ngenyauhka diri. Iya lebih agi serius lebuh mantaika keretas dalam seminar tauka licha. Tang iya mega nemu narit ati sereta ngasuh orang ketawa lebuh meri jaku.
Iya mega suah berunding. Taja pan udah datai di rumah, iya enda kala ngetu gawa sereta bepikir. Ngambika iya enda kelalu berundingka pasal pengawa, aku meri iya sebengkah perengka ‘smart’ ngambika iya ulih main ‘Word Wrap’ ti dikerinduka iya.Lebuh iya bemain nya, iya ngensung lagu-lagu ti dikerinduka iya baka ‘I can’t help falling in love with you’, ‘Mona Lisa’ enggau ‘Blueberry Hill’.
Enggau chara iya empu, iya seiku mensia ke bisi penyayau sereta romantik, tau dikearap, nemu nimbang orang bukai, ngembuan ati manah, nelap sereta ulih endur bepanggai.
Taja pan dipeda baka ke serius, dalam lubuk ati iya, iya nelap sereta bisi penyayau. Iya nemu ninga lalu iya ngasuh aku ketawa. Iya jarang tuchum tang ninting kali iya tuchum, aku suah madahka iya sigat.
Lalu iya gaga lebuh aku nyebut baka nya. Iya amat rinduka muzik lalu kala belagu enti iya deka madahka pengerindu iya ngagai aku. Bakani aku enda tetarit ati ngagai seiku lelaki ke belagu ke aku?
Aku berasai selamat tiap kali aku bisi enggau iya. Jadi enggau iya endang pemutus ti pemadu manah kala digaga aku. Iya endang ‘soul mate’ aku sereta pangan aku ke pemadu manah.
Aku ke nyadi bini iya nentuka aku nemu nama utai ti diguna iya lalu nama utai ti dikerinduka iya. Ke iya, aku sanggup ngereja utai enggau pemadu silik ngambika aku ulih nyaga iya laban aku madah ngagai diri empu, ‘Nuan endang beberekat laban bisi lelaki ke baka nya nyadi laki, nama agi utai bukai ti dikedeka nuan?” Nya alai, ambika chunto lebuh iya tabin renga, aku enda tinduk ngambika iya nadai apa nama.
Kelimpah ari nyadi pangan dalam pengidup aku, iya mega pengajar dalam pengidup aku. Aku mayuh belajar lebuh aku idup nyadi bini iya. Kami meretika pangan diri lalu kami bejaku manah enggau pangan diri. Pemadu beguna amat, kami arapka pangan diri. Iya arapka aku enggau pengabis ati lalu ketegal nya, aku bejejimat lebuh ngereja utai ngambika aku enda salah nguna pengarap iya ba aku. Udah tentu kami bisi penyilap lalu kami mega kala belaya, tang enda lama. Aku suah ngelakka iya lalu kami duai bebaik baru udah setengah jam. Iya udah bisi mayuh pekara ti patut ditapi, aku enggai nambah penanggul iya.
T: Kati asai ati nuan lebuh iya mangku pengawa nyadi Kepala Menteri ?
JA: Aku arapka iya ulih ngintu rayat enggau manah. Sida udah milih iya lalu aku deka meda iya nyadi seiku Kepala Menteri ke semua rayat di Sarawak ngambika ngiring menua tu mansang dalam ekonomi sereta nyadi sebuah menua ti nyulut. Rayat bisi mayuh juluk ati lalu aku arap iya ulih nyapai sekeda ari nya, enti enda ulih semua.
Aku ke nyadi pengundi ba sitak iya, bela bekunsi juluk ati ngambika iya nyadi Kepala Menteri ke semua orang, semua bansa nyengkaum penyakal laban sida mega rayat Sarawak.
Aku anak seiku polis Melanau asil enggau seiku indu ari Bau. Aku besai di Bau lalu dia kami nadai bebagi bansa, tang meda semua orang baka sebaka magang lalu bekaul nundaka penemu nya. Nya kebuah aku ulih bejaku dalam jaku Hakka enggau Bidayuh. Rebak apai indai aku mega bisi peneleba ke baka nya lalu peneleba sida ngajar anak-anak sida. Tu meh kitai rayat Sarawak enda bebagi bansa, tang meda semua orang baka individu. Nya alai aku setuju enggau polisi iya ti nyekat orang ke ngembuan penemu ekstrim.
Aku mega muji iya ketegal polisi pasal nyaga rampa menua. Ke bendar, rampa menua mega ngirauka iya. Ba jaku keterubah iya ba taun 1978, iya udah bejaku pasal nyaga kampung, ngelindung sungai sereta nyaga flora enggau fauna.
T: Di belakang tetiap iku lelaki ke ngembuan pangkat besai, suah bisi seiku indu ke seruran nyukung iya. Bakani chara Datin ngatur awak begulai enggau YAB Tan Sri?
JA: Aku meretika tanggungpengawa ke dipangku Tan Sri, tanggungpengawa sereta komitmen ke diberi ngagai rayat. Aku seruran meri awak ngagai iya lebuh ti minta diungkupka awak ngatika diri pengudah lelak bejalaika pengawa. Dalam pekara tu, aku megai semua tanggungpengawa ba rumah sereta enda sekekali ngachau pengawa iya ke ngintu rayat enggau nengeri tu. Aku nguji enggau naka ulih nyaga pengerai iya nyengkaum nyendia pemakai ke chukup sereta ngungkupka awak belelak ke chukup.
Dalam ruang bilik kami, aku meri komitmen sereta tanggungpengawa enggau naka ulih. Sebarang pekara ke bisi nyadi di rumah aku putarka enggau chukup professionyel laban aku nemu Tan Sri ngembuan tanggungpengawa ke lebih besai ungkup rayat.
Ba pengawa politik Tan Sri, aku nyukung dalam semua sukut. Aku ari sitak ke dipegai iya, aku mega bisi nyaup ngedutka kaul enggau raban indu di sitak nya taja pan aku ukai ari raban Parti Pesaka Bumiputera Bersatu (PBB).
Aku mega bisi nyaup Tan Sri dalam bejalaika program ba sitak ke dipegai iya baka pekit nyumai, licha ba jalai pengarap sereta program bekaul enggau pelajar.
Nengah program ke baka nya, aku ulih ngedutka kaul enggau rayat sereta mendingka sebana bekaul enggau penanggul ke ditapi sida.
Kelimpah ari nya, aku mega chakah bejalaika pengawa bekaul enggau pekara rama, mantu raban bansa ke lebih agi ba sukut pelajar tauka jalai pengarap.
Tan Sri chukup siruka raban nembiak sereta raban ke enda manah nasit, nya kebuah iya seruran ngemeratka raban tu. Aku nyaup iya dalam semua pekara dikena mantu raban tu.
Aku nyaup iya dalam semua pekara, tang seiti pekara aku enda ulih masuk champur iya nya dalam nentuka sebarang pemutus ke digaga iya. Nya ukai tanggungpengawa aku.
T: Nama ti dikemeratka nuan laban diatu dipeda penuduk nuan ulih mai ubah ba sekeda pekara?
JA: Aku chukup ngemeratka raban orang indu dalam semua pekara ke lebih agi orang indu ti diau di menua pesisir. Aku ukai datai ari ruang bilik bepemisi sereta diau di menua pesisir, aku nemu pengurang nya. Nya alai diatu, sekumbang agi ulih bejalaika pengawa ti tau nguntungka mensia mayuh, aku enda kala mantah. Naka ke diatu, aku berasai chukup diberekat ari petara. Nya alai dikena aku meri terima kasih, aku ngaga mayuh aktiviti ungkup rayat. Nya kebuah aku seruran masuk ba pengawa meri bantu ngagai raban ti begunaka bantu, taja pan Tan Sri bedau dipaduka nyadi Kepala Menteri suba.
Nyadi Presiden Gerempung Menteri-Menteri Sarawak sereta Gerempung Bini-Bini Menteri (Sabati), aku ulih ngereja mayuh agi pengawa diatu. Kitai ulih ngena penuduk nya dikena mupu mayuh agi belanja dikena mantu sereta nyaup sebarang program nyengkaum meri inisiatif sereta ngulihka belanja dikena meli perengka ba sepital.
Komitmen timpuh panjai aku ke bukai iya nya nyadi raban ‘Lembaga Amanah Yayasan Jantung Nengeri Sarawak’ ke alai aku seiku ari pengemun kelimpah ari raban Organisasyen Kebajikan Islam Malaysia(Perkim).
Kelimpah ari nya, aku mega mangku tanggungpengawa mantu raban indu ke lebih ke diau di menua pesisir ke alai sida disikap enggau mayuh bansa pengelandik.
Pengudah beberapa taun bejalaika pengawa meri bantu, aku tetemuka seiti pekara iya nya barang sapa ti gerah jari meri bantu sereta enda bekira, iya deka diberekat petara.
T: Ulih Datin bekunsika penemu bakani kitai bulih pementas dalam rumah tangga?
JA: Ba aku, pengawa jadi melaki bini tu indah enda baka sebuah taman ke alai kitai patut nyaga taman nya enggau manah, sereta nyeliahka sebarang pekara ke tau ngerusak taman nya. Baka nya meh dalam pekara jadi melaki bini tu.
Pemadu beguna iya nya, kitai patut bebasaka pangan diri dalam semua pekara. Baik salah tauka enda, kitai patut ngemaruhka diri ngambika enda muntang nyadi sebarang laya tauka beserekang penemu.
Laki patut pechayaka bini, pia mega bini patut pechayaka laki. Anang sekekali ngembuan runding ke enda manah, seruran deka belaya dalam semua pekara enda ngira pekara mit tauka besai.
Ambika chunto, dikena nirika rumahtangga ti likun, seiti chara engka beguna ngagai kitai semua iya nya, laki tauka bini tau bekunsi pengerindu, juluk ati sereta mayuh agi pekara bukai ti ngerinduka ati, baka merindang ati diri enggau belagu.
Ke penudi endar, tetiap iku lelaki patut nerima bini iya enggau ati ti lurus. Tan Sri seiku laki ke chukup sayauka bini anak sereta ngemeratka ruang bilik kami ngambika semampai likun. Ba aku, pengasih enggau penyayau ke diberi Tan Sri ngagai kami sebilik besai agi reti ari ke diterima iya dalam pengawa politik. Nadai takat penyayau iya ngagai kami sebilik, indah enda baka mata panas ke enda nemu padam.