ADENAN
GENAP setaun Kepala Menteri, Datuk Patinggi Tan Sri Adenan Satem udah mangku pengawa merintah nengeri tu. Lebuh ti ditanya bekaul enggau juluk ati iya, Adenan besemaya deka chakah agi bejalaika pengawa dikena nempa mayuh macham pemansang ungkup semua raban bansa di nengeri Sarawak.
Lebuh ti nyaut tanya bekaul enggau juluk iya ngemansangka nengeri Sarawak, Adenan madah, “Tetiap iku mensia patut bisi ngembuan juluk ke besai ngemansangka nengeri tu, tang dalam awak ke sama mega kitai patut nentuka bagi juluk ke ulih dijapai tauka enda.”
Dikena nyapai juluk nya, Adenan bepenemu pekara ke patut dulu dikemeratka iya nya menang ba Pengawa Bepilih Kunsil Nengeri (PRN) ke disadang deka diatur dalam bulan Jun 2016.
Seiti tanggungpengawa ke chukup besai deka ditapi kitai iya nya PRN ti deka datai. Naka ke diatu, kitai udah nyikap diri enggau naka ulih, tang ukai seratus peratus. Kebuah aku madah munyi nya laban maya PRN ke amat bedau ditetapka. Sebarang atur ulih berubah. Ambika banding, enti sema aku madahka PRN diatur diatu, semua kitai engka madahka diri udah besedia.
Pemutus nentuka maya PRN tu diatu endang bepanggai ba kitai (perintah), ukai penyakal. Nya alai, aku udah merambu mayuh bengkah pekara ungkup nengeri Sarawak,” ku Adenan.
Iya madah munyi nya ngagai pengarang berita The Borneo Post beserimbai enggau ulangtaun ti keterubah iya mangku pengawa nyadi Kepala Menteri Sarawak seharitu (28 Februari 2015).
Ku iya baru, bekaul enggau pemutus nambahka 11 iti sitak DUN baru ari 71 iti sitak ke sebedau tu tampak ulih meri peluang ngagai Barisan Nasional (BN) menang mayuh agi penuduk DUN dalam PRN ti deka datai.
Naka ulih aku milih sapa bagi chalun ari BN ke disadang ulih menang besai nyengkaum chalun ari Tanjung Datu,” ku Adenan.
Lebuh ti ditanya sekalika BN deka ngungkupka tikit ngagai kededua parti United People’s Party (UPP) enggau Parti Tenaga Rakyat Sarawak (Teras), tu saut iya; Engka nadai penanggul kededua parti tu diungkupka penuduk nengah tikit BN laban sitak DUN baru udah nambah.”
Empai lama ke udah, empat buah pampang parti Barisan Nasional iya nya Parti Pesaka Bumiputera Bersatu (PBB), Parti Sa’ati Rakyat Sarawak (SUPP), Parti Rakyat Sarawak (PRS) enggau Parti Progresif Demokratik Sarawak (SPDP) udah duduk segulai bejurai sereta beaumka pekara bekaul enggau kededua parti UPP enggau Teras sekalika patut diungkupka sitak DUN dalam PRN ti deka datai.
Ba PRN sebedau tu ke diatur dalam taun 2011, PBB diungkupka 35 iti penuduk, SUPP (19), PRS (9) lalu SPDP (8).
SUPP nerima nasit ke enda bangat manah lebuh ti alah ba 13 iti penuduk ke alai parti nya bepilih. SPDP mega nerima nasit ke sama lebuh ti alah dalam iti buah sitak lalu PRS alah ba seiti sitak DUN.
Taja pia, PBB ke nyadi tulang belakang BN nengeri mujur menang ba semua penuduk ke alai sida bepilih.
Dalam pekara ke sama, Adenan ke mega Chairman Barisan Nasional (BN) Nengeri madah, nadai kebuah Parti Tindakan Demokratik (DAP) masuk dalam BN nengeri.
Aku nadai ngembuan kuasa mai tama raban parti ke ukai ari perintah BN nyadi raban kabinet nengeri.
Ba Perintah Besai, sida tau ngaga baka tu laban sida tau milih sebarang orang nyadi Senator dulu.
Tang di Sarawak, pekara nya enda ulih diterima laban kitai ngembuan atur tauka undang-undang,” ku iya.
Lebuh ditanya bekaul enggau pemujur sereta kerejasama raban kabinet nengeri ke dipegai iya, Adenan madahka diri chukup lantang gawa begulai enggau semua raban kabinet sereta seruran bebasaka pangan diri kelimpah ari chukup chakah bejalaika pengawa.
Sekumbang setaun mangku pengawa berat nyadi Kepala Menteri, Adenan udah mujur mai mayuh ubah ngagai nengeri Sarawak nyengkaum mujur ngemunaska pengawa berimba kampung enggau nadai pemendar.
“Aku enda peduli sekalika nerima sebana tauka enda, pekara ke chukup dikemeratka aku iya nya pengelikun rayat kelimpah ari pengelurus runding ngagai semua.
Enti sema bisi ke enda puas ati, nya bepanggai ba sida. Tang enti nadai sebana, nadai ngawa,” ku iya.
Adenan ke mega Menteri Pengatur Pengeraja Asal enggau Rampa Menua madahka diri deka nambahka mayuh agi taman Negara sereta ngurangka penyampau lisin berimba kampung ti deka diberi pemendar.
Kebuah penyampau lisin tu dikurangka dikena ngurangka pengawa berimba kampung enggau nadai pemendar kelimpah ari nyaga pengelikun enggau pemanah kampung ke tau nyadika taman Negara.
Rayat engka enda ingat, aku ADUN ti keterubah kala mantaika penemu bekaul enggau rampa menua dalam taun 1979 suba. Diatu semak 40 taun udah. Diatu aku ngembuan awak dikena nyaga pengelikun rampa menua enggau naka ulih,” ku iya.
Adenan mega madahka diri deka majak ngemeratka pekara ti bekaul enggau tanah.
Dikena meri pengelantang sereta ngelempungka tating pengidup rayat Sarawak, Adenan mega bisi ngenataika peminta nurunka tarif lekterik ungkup nengeri tu ba pun taun tu tadi.
“Bekaul enggau tarif rega lekterik tu, enti kompeni menua luar ulih nerima rega ke murah, nama kebuah kompeni ari menua tu empu enda ulih nerima penguntung ke sama?,” ku iya.
Pengudah setaun mangku pengawa nyadi Kepala Menteri, Adenan chukup gaga ati laban sida sebilik seruran nyukung iya dalam semua pengawa ke dikereja, ke lebih agi bini iya Datin Patinggi Puan Sri Dato Jamilah Anu.