Dikarang Chris Bishop//
SRI AMAN: Menteri Besai Datuk Seri Najib Tun Razak sekali agi netapka pekara ke bekaul enggau penuduk UPP engau TERAS dilempaika ngagai Chairman Barisan Nasional (BN) Sarawak ke mega Kepala Menteri Datuk Patinggi Tan Sri Adenan Satem.
“Sentang pekara ke bekaul enggau kededua UPP enggau TERAS, aku nitihka BN Sarawak. Pekara tu tebal agi bekait enggau BN Sarawak.
“Semua atur dilempai ngagai Adenan lalu iya ke pemadu berat iya nya kitai deka nentuka BN teulihka pemujur ba pengawa bepilih kunsil nengeri (PRN) ti deka datai.
“Pemujur ba pengawa bepilih nyadi batang pekara ke pemadu dikemerat lalu kitai deka begigaka formula ke pemadu manah ngambika pemujur suba ulih ditempa baru,”ku iya.
Najib mansutka jaku tu maya nyaut tanya ba sebengkah aum pengarang berita ke diatur pengudah bejadi pengawa ngengkahka batu pemun Sepital Pakar Minor Sri Aman ditu, kemari.
Najib pechaya penyerekang penemu entara sekeda raban dalam serakup BN Sarawak ulih diputar nengah chara ke pemadu manah.
Bejaku ngenang penemuai kereja iya pengelama tiga hari di Sarawak, Najib madahka program ke ditusun chukup meruan ke alai iya ukai semina ngelawa sekeda kandang endur tang mega ngembuan awak betemu enggau rayat.
“Kelimpah ari nya, aku ulih matau sekeda pemutus ke udah dulu digaga perintah dipejalai enggau manah baka ke sepital baru tu.
“Aku mega bisi nerima pinta projek baru ari perintah nengeri, peminta nya deka diperunding ngambika ulih mantu ngangkatka pemansang enggau pengelantang rayat,”ku iya.