Program Bantuan Rumah tembu nadai nitihka standard, bilik natam ai alai nyamuk betansang

0

PUTAR ENGGAU LENGKAS: Ting berumban datai ngabas rumah PBR enggi Law di Jalai Ming Tee ditu udah ke iya nerima berita nya, kemari.

BINTANGOR: Opis perintah ti bekaul patut mansik enggau silik tikas penembu rumah ari Program Bantuan Rumah (PBR) sebedau kunteriktor dibayar nitihka pematut.

Kaban Kunsil Nengeri (ADUN) Meradong Ting Tze Fui madah, bisi penanggul ke nyadi ngujungka rumah nya enda ulih alai diau ketegal digaga nadai nitihka standard.

“Tu ukai pekara ti baru. Orang ke diberi projek tu deka napi penusah ketegal ulah kunteriktor semina berumban nembuka projek,” pia ku iya madah ngagai pengarang berita, kemari.

Iya mantaika penemu nya udah ke datai ngabas rumah PBR enggi Law King Hoon ba Jalai Ming Tee di Bintangor, kemari.

Dulu agi ari nya, iya bisi nerima sebana ari Law madahka rumah nya empai ulih alai diau taja udah tembu bulan Ogos 2013 suba.

Rumah nya empai ulih alai diau laban ninting maya hari ujan rumah nya ampuh ai ketegal semin ke dikena ngaga geledak kelalu nipis ngujungka tekerap urung tiga inchi.

Pekara tu ku Ting tau bendar ngeruga pengelikun orang ke ngempu rumah nya.

“Ketegal nya Law empai ulih pindah lalu mengkang diau ba rumah lama iya ti udah enda likun alai diau laban udah kelalu lama,” ku iya madahka baru.

Ting mega madah, ai agi mengkang melenang ba sebengkah bilik dalam rumah nya nyentuk ke sehari tu.

Pekara tu ku iya ngujungka nyamuk bisi dipeda betelu dia ti tau bendar ngenataika penyakit denggi.

“Taja empai diau ba rumah nya tang rumah Law semina beberapa meter aja ari rumah tu.

“Kitai nangi nyamuk ke betansang ba rumah tu tau ngeruga pengerai Law,” pia ku iya madah.

Penusah nya kala dibai Law ngagai Opis Bekuasa Menua (PBT) tang nyentuk ke sehari tu penusah nya empai ulih diputar kelimpah kunteriktor baka ke enda ngibuh projek ke digaga sida nya.

“PBT megai tanggungpengawa nentuka kunteriktor tu bejalaika pengawa sida enggau manah tang ukai semina ngudahka aja.

“Aku deka nulis surat ngagai PBT ditu ngambi penusah ke ditapi Law ulih diputar kelimpah nyeliah penusah ke sebaka diasaika orang bukai,” pia ku iya madah.