Rayat dilalau nguna media rama enggau chara ke meruan sereta badu ngerembaika berita selebubu ngapa
DEBAK: Pekara besai ke balat ngeruga pengelantang enggau pengelikun menua ke maya hari tu iya nya ‘propaganda enda beradat’ ke muntang ngelekai ngerembai nengah media rama.
Menteri Kebun Dandang Besai enggau Komiditi, Datuk Amar Douglas Uggah Embas madah, teknologi moden ke dikembuan semua piak nengah bantu Teknologi Pemadah (IT) kemaya hari tu nyadi sebengkah penanggul baru ngagai semua piak kelebih agi ba sukut penyerakup enggau kaul entara semua raban bansa di menua tu.
“Chara nguna media rama ke salah sereta nadai betatak tau ngujungka penyarut nyadi kelimpah ngeruga pengelikun enggau pengelantang ke disepi rayat di menua tu.
“Pekara tu nyadi datai ari kitai empu. Ngangkaika ‘jaku tuduh enda beradat’ ba internet lalu tentu tau ngeruga semua pengelantang ke disepi kitai diatu.
“Rayat ditu dilalau ngambika enda muntang pechayaka jaku petenah enggau isu sengapa ke bisi didinga laban nya sengaja dikenataika piak ke deka ngiga penguntung kediri empu,” ku iya.
Uggah madah munyi nya lebuh ti bejaku ba sebengkah awak beserimbai enggau pengerami makai lemai Taun Baru China (TBC) Debak ke diatur ba Dewan Sekolah Jenis Kebangsaan (SJK) Chung Hua Debak, empai lama ke udah.
Uggah ke mega Kaban Parlimen (MP) Betong madah, media rama patut ngemeratka pemanah sereta pengelikun semua piak, ukai nyadika media rama pelasar dikena ngenataika penyarut, betenahka sebarang orang tauka ngerembaika berita selebubu ngapa ka tau ngeruga pengelikun mensia mayuh.
“Endang enda disangkal, penatai media baru baka tu ulih muka awak ngagai sebarang orang dikena ngerembaika penemu tauka runding ke enda manah enggau jampat.
“Ketebal agi utai ke bisi ayan ba media rama nadai ngembuan pengamat sereta udu bula.
Nya alai, Uggah ngelalau semua rayat di menua tu ngambi terus ngemeranka pengelikun sereta penyerakup entara raban bansa ke dikemeran kenyau ari suba nyentuk seharitu ngambika menua muntang nyapai pemujur ke lebih besai dudi hari ila.
“Pengelikun enggau penyerakup ke dikemeranka semua raban bansa nyadika kunchi tauka pelasar dikena ngemansangka menua.
“Aku ngarapka TBC ke diintu taun tu ulih muka awak baru ungkup semua rayat menua Malaysia kelebih agi rayat di nengeri Sarawak dikena ngaga ubah pemansang sereta nempa transformasyen ba sukut ekonomi ke tau ngenataika pemansang ngagai menua tu.
“Pekara tu semua patut bepelasarka sebuah kaul ke manah entara semua raban bansa laban pengelikun sereta penyerakup ke manah nyadi tiang pemun dikena ngenegapka pemujur ke ditempa menua kitai,” ku iya.
Kenu ku iya, perintah ari baru perintah Barisan Nasional (BN) enda kala melakangka raban bansa China. Pemansang tetap diungkupka ngagai raban bansa tu ngambika sida sama bela ampit ngasaika pengelantang sebaka bansa bukai.
“Taun tu, kitai deka meri tumpu ke lebih besai ngagai sukut pemansang pelajar di semua sekula China ditu dikena meri pengelantang ngagai raban pengajar sereta raban nembiak,” ku iya.
Dalam pengerami nya, Uggah bisi nyuaka agih belanja beungkus RM63,000 ngagai Gerempung Chung Hua Debak, Komiti SJK (C) Chung Hua Debak sereta Gerempung Apai Indai enggau Pengajar (PIBG), SJK (C) Chung Hua Debak. Agih belanja ke sama mega bisi di kenataika Sapit Kepala Menteri, Datuk Patinggi Tan Sri Alfred Jabu Numpang, Kaban Kunsil Nengeri (ADUN) Saribas, Mohamad Razi Sitam sereta ADUN Bukit Saban, Robert Lawson Chuat.